League Cup champion Man City

Manchester City chuan Pathianni zan khan penalty shootout-ah Chelsea hnehin Wembley Stadium-ah Carabao Cup nomawi an chawi. Ropuina ram dang thleng turin Pep Guardiola hote ban phakah Champions League, Premier League leh FA Cup a la awm.

League Cup final-ah goal hmuh tur a awm lo mah se extra time tawp hma chiahin Blues goalkeeper Kepa Arrizabalaga chuan manager Maurizio Sarri thupek zawm loin thlak a duh lo a, inkhel boruak a sang hle. A tawpah Man City an vannei a, penalty shootout-ah 4-3 in hnehna an chang.

Guardiola leh Sarri ten an ṭhat dan berin player an rem ve ve a, khelmualah erawh rinlawk ang ngeiin Man City an chungnung zawk. League Cup champion lai hian kar hnih liam taah 6-0 in an hneh tawh a, hei hian final boruak vaw dai deuh nachungin nomawi inchuhna erawh a dang.

Man City-in ball an chang tam a, chance ṭha insiam erawh an harsat. Etihad Stadium-a hattrick siamtu Sergio Aguero pawh goal hmaah a ke a hmui lo, Argentine forward hian hnai tak aṭangin a hlah bakah a goal khung chu offside vangin pawm a ni lo.

Hun pangngai leh extra time-ah goal lut lo mah se Chelsea leh Manchester United manager hlui Jose Mourinho erawhin a elpui Man City hi a dah sang hle. Portuguese manager chuan, "Man City hi engkim hria an ni. Ka thusawi awmzia chu thil te tham thlengin an ngai pawimawh a, a tawpah an chan ṭhatna atan an hmang ṭhin. An khingpuiten yellow card an hmuh nan pawh player pathum paliin referee an hual ṭhin a, chutihrualin football ṭha tak an khel bawk," tiin an uchuakna lai a sawi lang tel zauh bawk.

Chelsea pawh an intawn hmasak nena thlir chuan team dang daih an ni a, Eden Hazard-a ṭhat zia pholanin a awm. London club-in theihna sang tak an nei tih a lang a, amaherawhchu extra time tawp hma hretin keeper Kepa Arrizabalaga chu Sarri-a'n thlak a tum chungin a chhuak duh tlat lo a, champion zui ta Man City chanchin aiin he thil thleng hian sawi zui a hlawh zawk.

Penalty shootout-ah Sarri fachuam Jorginho-a'n pet hmasa berin Man City keeper Ederson-a'n a dan sak. Blues keeper Kepa hian hmingchhiat thup nan Leroy Sane penalty pet dang mah se City tan lkay Gundogan, Sergio Aguero leh Bernardo Silva ten an khung vek a. Chelsea tan David Luiz-a'n goal ban a pet per bawk avagnin Cesar Azplicueta, Emerson leh Eden Hazard te goal khungin awmzia a nei lo.

Man City manager Pep Guardiola chuan, "Final a nih avangin a harsa dawn tih kan hria a, kan khingpui Chelsea hi ka team hmachhawn tawh zingah chuan tawh khirh ber zinga mi a ni. Eithad Stadium-a kan chakna zat avang khan an zahawmna neih let an tum a, tun ṭuma kan inkhelh dan hi chuan Stamford Bridge-a kan chak loh ṭum nen khan a inang hle," tiin a khingpui team a fak.

Amaherawhchu Man City lawm a kim lo a, first half tawp hma hretin Aymeric Laporte chu inhliam vangin Vincent Kompany-a'n a thlak a, minute 90-naah inhliam vang bawkin Fernandinho aiah Danilo luhtir a ṭul a, player pawimawh pahnih hi an chawlh rih a ṭul ang.

Spanish manager Pep Guardiola chuan, "Inelna pali hmachhawn hi chu a har em em a, kan nomawi vang hian Champions League leh Premier League chu a harsat phah ang. Chutihrualin nomawi leh hnehna chan hi chuan phurna min pe a, Community Shield nen title pahnih chu ka la phawt e," tiin nomawi tam zawk chawi an la tum thu a sawi.

City Centre-back John Stones leh left-back Benjamin Mendy te chu inhliam vangin an la khel thei lo a, March 12-a Schalke nen second leg an khelh hunah hrem vangin Nicolas Otamendi a khel thei dawn lo bawk. Chutihrualin Man City hian Pep Guardiola hnuaia season hmasa berah nomawi chawi lo mah se season hnihnaah Premier League leh League Cup nomawi an chawi a, tun season-ah phei chuan nomawi lian zinga chhiar loh Community Shield thlengin an la tawh a, amaherawhchu Premier League emaw Champions League an champion loh chuan lawm a kim lo ang.