Sarri thlak ngam loh Kepa

Chelsea manager Maurizio Sarri chuan League Cup final-ah keeper Kepa Arrizabalaga chu thlak a tum a, Spanish keeper a chhuak duh lo. Blues manager luhtir tum hi Willy Caballero a ni a, 2016 League Cup final-a penalty vawi thum dangtu a nih avangin hun tawp boruak a tih ngaihnawm phah hle.

Minute hnih chiah khelh tur a la awmin hliam vangin Kepa enkawl a ngai a, Sarri chuan keeper tawnhriat ngah zawk Caballero chu lut turin thu thlukna a siam.

Khawvel keeper manto ber Kepa chuan an manager thutlukna chu a pawm lo nasa a, substitution board-a jersey no. 1 a intar kulh hnuah pawh chhuah tumna reng a nei lo. Spanish keeper man pound maktaduai 71 leh a chet dan chu a uchuak ve ve tiin a sawi zawm theih.

Referee Jonathan Moss leh defender David Luiz te pawhin Kepa hi hmin tumin an be hial a, chhuah a tum phah chuang lo. Mual sira awm Sarri leh assistant manager Gianfranco Zola te an lung ni lo tih a lang a, amaherawhchu referee Moss nena an inbiak nawn hnuah substitution an siam ta lo.

Sarri thinrim chu technical area-ah an inhrosa chhunzawm a, stadium chhuahsan tur ni awm taka a chhuah hnuah a rawn let leh a. Buaina erawh a la fel lo, penalty shootout hmain Antonio Rudiger chuan manager Sarri hi keeper Kepa a pan hnai tur chu a pawt let leh bawk.

Inkhelh banah Chelsea manager Sarri chuan, "Kepa chet dan hmang kha dik lo mah se a thil tum erawh a dik a ni. Penalty hmachhawn tur khan a dam ṭha a, doctor-ten min hrilhfiah hnuah thil awm dan kha ka hrethiam chiah a, khami hma zawng kha chuan ka thinrim em em a ni," tiin an inhriatfiah tawn loh vang a nih thu a sawi.

Chelsea keeper Kepa pawh insawifiahin, "Ṭum hnih enkawl a ka nih tawh avangin ka khelh tluan theih a beisei lo a, amaherawhchu doctor ten an hrilhfiah hnuah engkim a ṭha. Manager thu zawm ka duh loh lam a ni lo a, ka dam ṭha tih hrilh ka tum vang zawk a ni. Amah nen pawh kan inbe tawh a, kan inhriat fuh loh vang a ni a, tunah chuan a ṭha vek tawh e," a ti.

Sarri leh Kepa te insawifiahna hi an chet dan hmutu chuan an pawm kher lo ang. Chelsea manager Sarri hian Manchester City-in an sawp ṭumin inkhelh banah Pep Guardiola a chibai lo a, inkhelh banah erawh a hmuh loh vang tiin a insawi fihlim.

Tun ṭum erawh a dang tawh. Bench aṭanga luh tur Caballero hian Man City tana a khelh laiin Liverpool chu League Final-ah an hneh a, hemi ṭum hian Fernandinho chuan pet goal lo mah se Argentine keeper hian Lucas Leiva, Philippe Coutinho leh Adam Lallana te pet dang vekin hnehna a chanpui. Chuvangin Sarri hian Kepa hi a hliam vang ni loin Caballero a rin vang zawkin substitution siam a tum a ni thei a, tun dinhmunah erawh Italian manager ka aṭangin thudik a hriat theih rih lo ang.

Sky Sports-in a ziah danah chuan penalty shootout zawh tawh hnuah Caballero leh Kepa te hi an in chibai a, keeper pahnih inkarah buaina awm lo mah se Chelsea leh football ngainatuten Spanish keeper an hmuh dan erawh a dang tawh.

Chelsea striker hlui Chris Sutton chuan, "Kepa hian Chelsea kawr hi a ha leh tawh tur a ni lo. Club timualpho tu a ni a, khatiang kha ka hmu ngai lo. Sarri chu ni ila, ka bang ang. Player pawhin ti nge Kepa kha an namchhuah luih loh. Sarri ni loin Kepa hi ban tur chu a ni," tiin a sawi.

Online hmanga enna DAZN tana pundit Jose Mourinho chuan, "A inrintawkna ka hmu a, ka lawm zawng tak a ni. Amaherawhchu a chhuah duh loh avang khan manager, staff leh player-te dinhmun harsa takah a dah a, pawi ka tihpui takzet a ni," tiin Kepa chet dan a dem.

Social media kaltlangin Kepa chet dan demna a darh nghal a; 'Chelsea manager thar' tih ṭawngkam te hman niin London club tana khel zel tlakah an ngai lo. Blues hian Nilaini zanah Tottenham an mikhual dawn a, Kepa chungchanga Sarri thutluknain ngaihven a hlawh ang.