Dr T. Ao U21 football-ah group hmahruaitu Mizoram

2nd Dr T. Ao North East International NEC Gold Cup Under 21 Football Championship-ah Mizoram chuan nimin khan Tripura 4-0 in an hneh a, group B hmahruaitu an ni. Mizoram elpui Meghalaya erawhin group match hnuhnung berah Manipur 2-0 in an hneh lo a, group B pahnihna niin semifinal an lut.

Assam-a inelna neihah Mizoram hi match hmasa paliah vawi thum chakin vawi khat an inhnehtawk a, match hnuhnung berah hian chak turin harsatna an nei lo. Tripura nen hian Mizoram tan Lalremruata chuan minute 16-na lekah goal a khung a, second half-ah Lalbiaknia Royte (72'), Lalmawizuala (90+1') leh PC Lalhriatpuia (90+2') ten an khung.

Semifinal hi February 27-ah khelh a ni dawn a, Mizoram hmachhawn tur a la chiang lo. Group A-ah Sikkim leh Bangladesh te semifinal an lut a, nizan khan team pahnih hian group hmahruaitu zawnna an nei a, resut kan hre hman lo. Mizoram team hi coach Vanlalpeka leh manager Peter Lalzawmliana ten an enkawl a, player tam zawk hi Khelo India Youth Games Under 21 football-a gold medal latute kha an ni.