Palinaah Arsenal an kai

Premier League aṭanga Champions League khelh phak tum Arsenal chuan Pathianni zan khan an mikhual Southampton 2-0 in an hneh a, Unai Emery naute hian point 53 hmuin palina dinhmun an luah.

Emirates Stadium-a inkhelah a tir lam minute 20 chhungin thil pawimawh pali a thleng hman vek. Arsenal keeper Bernd Leno-a'n Nathan Redmond leh Matt Targett te goal khung ngei tura ngaih a dang hlauh.

Mualneitu Gunners lam erawhin an hun ṭha neih an khawhral lo. Minute rukna lekah Henrikh Mkhitaryan-a ball pet chu Alexandre Lacazette-a'n hnai zet aṭangin a su lut a, Armenian international Mkhitaryan hian minute 17-naah an goal hnihna a pet lut bawk.

Arsenal manager Unai Emery chuan, "Hun ṭha kan insiam thei a, hnehna chan kha kan phu zawk a ni. A nihna takah chuan minute 90 chhung khingpuite goal nawr hi a awlsam lo, a tir lam kan ṭan fuh khan thil a tih awlsam phah," tiin a sawi.

Palina nih hi Arsenal tan chanchin ṭha a ni a, chutih rualin an hnuai chiaha awm Manchester United nen an inthlauhna chu point khat chauh a nih bakah, parukna Chelsea-in match khat khelh hmabak an neihah hnehna an chang a nih chuan an point hmuh zat a inang chiah ang.

Nilaini zanah Gunners hian Bournemouth an mikhual dawn a, an mual bikah a zawnin vawi riat nan league match-a hnehna chan an tum ang. Saints hian an hnuai chiaha awm leh hniam ber dawt ni bawk Fulham an hmachhawn thung dawn; Ralph Hasenhuttl-a naute tan relegation zone chhuahsan theihna hun remchang a ni ang.