RFL Plastics MFA Futsal League Vawiinah quarterfinal first leg an khel dawn
RFL Plastics MFA Futsal League quarterfinal chu vawiin hian Electric Veng Indoor Stadium-ah khelh a ni dawn a, double leg hmanga khelh tur niin second leg hi February 28, Ningani hian khelh leh tur a ni.
Tlai dar 5:00 hian match hmasa berah ṭantu nei ṭha pahnih Laipuitlang club Laipui FC leh Zonuam FC te an inkhel dawn a, quarterfinal bul ṭanna a nung nghal dawn. Match khat rei zawng hi minute 50 (25+25) a ni a, ball thih apianga hun hi tihtawp ve zel a nih avangin inkhelh hun chhung a rei a, goal pawh a lut hnem ṭhin hle.
Laipui FC Vs Zonuam FC
Laipuitlang hi group A hmahruaitu an ni a, chu ṭantu an nei ṭha a, khawtlang an ṭangrual hi a ni. Laipui FC hian Armed Veng tlangval Lalbiakhlua an kawl a, tawnhriat ngah KT-a hoin tlar hnung an rem phui a, an tawh a khirh dawn.
Zonuam lam pawhin ṭantu an nei ṭha tho a, zanin hian a nei ṭha zawk chu a hriat ang! An veng tlangval Lalṭhazuala (Puitea) chu an star ni mah se an ṭan rualna hi an chakna a ni - vawiin tlaiah fans an neih ṭhat a pawimawh dawn.
Chanmari Vs FC Bungkawn
Chanmari hi team balance a ṭha a, bench thlengin an intluk tlang a, FC Bungkawn lakah team ṭha zawka ngaih an ni ang. Chutihrualin Bungkawn pawhin tum fel tak an neih chuan 'upset' an thlen theih a rinawm a, an player ṭha David leh Joseph-te'n mawhphurhna an lak theih a ṭul dawn a ni.
Chhinga Veng Vs Saron Veng FC
Chhinga Veng hian nikum khan final an lut a, tun ṭumah erawh coach Lalremruata'n a ho hman dawn loh avangin an fimkhur a ṭul ang. Lalsawmzela, Vanlalhriata leh C. Lalmuanpuia te chu futsal khel thiam an ni a, Saron Veng tana ven uluk tur an ni.
Saron erawh Kawnpui tlangval Lalbiakthanga awm hnuah team dang daih an ni a, theihna nei sang Hmangaihkima an kawl bawk avangin 'Aizawl East II derby' ah an hawi hniam bik lo ang.
IDBI Tuikual N Vs Ramhlun Venglai
Tuikual North club IDBI Capital hi team ṭha ber zinga mi an ni a, champion rinkai an ni pha. Goal khung thei Lalremruata an kawl a, quarterfinal an thleng lo a nih chuan an hrethiam lo ang.
Chutihrualin player langsar kawl lo Ramhlun Venglai hi zuam ngawt a thiang lo a, coach Lalrindika'n team boruak a tiṭha a, game plan fel tak nen khelh an awlsam dawn lo.