Morata a 'NIL' tawh lo; Atletico chakpui

Pathianni zan khan Alvaro Morata chuan Atletico Madrid a pan hnua a goal hmasa ber a khung ve leh ta a, Pathianni zan khan Villarreal lakah 2-0 in hnehna a chanpui. 

Atletico Madrid hian hnehna an chan avangin table-ah pahnihna dinhmun an sawhnghet zel a, mahse hmahruaitu Barcelona an phak lohna erawh point sarih ngawt a la tling. 

Pathumna dinhmun luahtu Real Madrid-in chak loh an duh bik lo. An mikhualna ramah Levante chu 2-1 in an hneh a, an goal hnih khung hi penalty aṭanga lut ve ve a ni. 

Real chak danin sawisel a hlawh a, an penalty hmuh pahnih hi video assistant referee rawn a nih hnua pek ve ve a ni a, Levante hian vawi hnih penalty hmuh an beisei chungin pek an ni lo thung. 

Chelsea aṭanga loan-a Atletico Madrid pantu Alvaro Morata-a'n minute 31-na lekah Madrid khaw club tan goal hmahruai a khung a, Atletico a pan hnua a goal khung hmasak ber a ni. 

Morata hian Atletico tan hian Champions League-a Juventus an hmachhawn ṭumin a khung tawh a, Real Madrid lakah a khung tawh bawk - mahse he a goal khung pahnih hi VAR rawn a nih hnuah pawm sak a ni lo ve ve. 

Real Madrid striker hlui hian a chunga thil thleng a theihnghilh lo, a goal khung lawm nan video assistant referee be ang deuhin a che vel - VAR tih elna a ni. 

Hun tawp nan minute hnih chiah a awm tawh tihin Saul Niguez chuan goal khat a khung ve bawk a, Villarreal-in a chhanletna tur an neih tawh loh avangin Atletico an chak. 

Real Madrid-in minute 43-na leka Karim Benzema penalty hmangin hmahruaina goal an khung a, he penalty hi Luka Modric-a'n Enis Bardhi kut a pet per avanga an hlawhchhuah a ni. 

First half-ah goal dang lut lo mah se Levante hian minute 60-naa an phu ang ngeiin si phurh sutna goal an khung a, first half-a post vawi hnih ngawt pet pertu Roger Marti chuan si phurh sutna goal hi a khung. 

Mahse, Levante hlim chhung a rei lo. Real hian minute 78-naah an penalty vawi hnihna an hlawh chhuak leh a, Gareth Bale chuan harsatna nei loin goal-ah a chantir. 

Inkhel boruak a sang a, minute 86-naah Real defender Nacho chu a yellow card pahnihna a hmuh avangin hnawhchhuah a ni a, Ruben Rochina chu minute 88-naah a yellow card pahnihna hmuh a ni bawk. Levante midfielder hi minute 60-a khelh hnuah lakchhuah ni mah se referee thutlukna duh loa a chet nat avangin bench aṭang hian hnawhchhuah a ni. 

Levante fan-ten an chak loh danah mawhpuh tur an nei a, chu chu referee a ni - VAR hmangin penalty vawi hnih ngawt chawitir an ni a, an lungawi lo a nih pawhin a awm lo hran lo. 

Penalty hmasa zawk hi Modric-a cross laka inven tum, Enis Bardhi chawi a ni a, a kut hmanga a hmai ven a tum chu ball-in a fuh. Penalty chawi lo zet mah se referee hian VAR hmangin a ennawn a, penalty a pe daih. 

Casemiro-a'n penalty hlawhchhuah tumin Cheick Doukoure nen ball an inchuhnaah a tlu a, referee hian penalty a pe - VAR official-te nen an sawiho hnuah a thutlukna ngaiah a ding tlang a, replay ennawn chuan Doukoure hian Casemiro a tawk fuh lo tih a lang.  

Levante hian vawi hnih ngawt penalty an beisei bawk - Jose Luis Morales laka Dani Carvajal foul leh Raphael Varane handball vangin penalty an beisei a, mahse referee hian a pe lo mai ni loin VAR pawh a rawn lo!