A chungah Dortmund awm chhunzawm

Borussia Dortmund chuan an match hnuhnung panga a chak ni hmel an hmuh loh hnuah Bayer Leverkusen 3-2 in an hneh leh ta a, match 23 aṭanga point 54 hmuin Bundesliga hmahruaitu an nih chhunzawm. Champion lai Bayern Munich aiin point thumin an sang fal leh ta rih a ni.

Signal Iduna Park-a inkhelah Jadon Sancho a hmuhnawm lehpek, English rawlthar duhawm hian goal a khung bakah Dan-Axel Zagadou-a khung tur a siamsak a, Germany international Mario Gotze-a'n an goal thumna a khung bawk.

Champions League khelh tum Leverkusen tan Kevin Volland leh Jonathan Tah ten goal khung ve mah se an mahmawh zat an khung zo lo. Tah-a hian season tir lama Dortmund nen an intawn ṭumin goal a khung tawh bawk a, mahse 4-2 in a club hi a tlawm pui tho a ni.