Tsitsipas tan nomawi pahnihna

Pathianni zan khan Stefanos Tsitsipas chuan Mikhail Kukushkin hnehin Marseille Open nomawi a chawi a, tun season chhunga title a lak hmasak ber niin tennis a khelh hunchhunga ATP title pahnih a lakna chiah a ni bawk.

Australian Open semifinalist hian Kazakhstan lakah hian 7-5, 7-6 (7-5) in hnehna a chang. Set hnihna bikah bul ṭan fuh loin 4-2 in hniam zawk hman mah se a khingpui service a chhuhsak hnuah nih rual lehin, tie break hmangin a tlang zui a ni.

Kum 20 mi Tsitsipas hian January thla khan Roger Federer hnehin khawvel hmaah player beiseiawm a nihna a lantir tawh a, Australian Open semifinal-ah Rafael Nadal hneh lo mah se a hming a chher tawh tho.

Nikum October thla khan Stockholm Open-a a champion chiah khan Greek player zinga ATP World Tour title la thei hmasa ber a ni a, tun dinhmunah world number 12 niin nomawi dang pawh a la chawi belh zel tura ngaih a ni.