Juve tan Dybala goal a tawk
Hneh loh nei loa Serie A hmahruaitu ni mek Juventus chuan Pathianni zan khan substitute Paulo Dybala goal khat hmangin Bologna chu 1-0 in an hneh hram a, pahnihna Napoli aiin point 13 ngawtin an sang fal tawh.
Tun hnai season sarih chhunga league nomawi chawi thei Juventus hian match 25-ah chak loh an la nei lo a, Pathianni zan inkhel dangah Napoli hian Parma 4-0 in hneh mah se an tan champion beiseina a sang tawh hran lo hle.
Cristiano Ronaldo awmna Turin club-in darkar khat chuang goal an khung thei lo, bench aṭanga rawn lut Dybala chuan Blaise Matuidi thawhrah sengin goal awmchhun a khung. Bologna lamin hun tawp dawnah Nicola Sansone hmangin an siphurh sut teuh hle mah se keeper Mattia Perin-a'n a san dak.
Tlahniam thei dinhmuna ding lai Bologna-in an mikhual Juve an chhaih buai hneh ve viau, goal khung tumin vawi 18 ngawt pet mah se an hlawhtling lo. Real Madrid forward hlui Ronaldo pawhin September 1, 2018 hnua a vawi khat nan khualmuala league match a khelhah goal a khung lo - a match hnuhnung pakuaah goal a khung vek a ni.
Pathianni zan inkhel dangah minute 101-naa Jordan Veretout penalty chhuih luh hmangin Fiorentina chuan an mikhual Inter Milan 3-3 in an inhnehtawkpui a, season thara Champions League khelh tum inum boruak a nun zual phah dawn.
Fiorentina defender Stefan de Vrij-a'n inkhel tir lamah anmahni lamah a ti lut palh a, mahse mikhual Inter lamin Matias Vecino, Matteo Politano leh Ivan Perisic te hmangin an chhang let a, 3-1 a hmahruaiin an dinhmun a ṭha hman.
Mahse, Luis Muriel-a'n freekick chhuih lutin Fiorentina beiseina a chhi nung. Hun pek belh minute sarihnaah D'Ambrosio-a'n penalty a chawi a, minute li chhung vel an inhnial buai hnuah VAR hman niin penalty pek an ni a, Veretout-a'n goal hlu tak khung nan a hman phah.
Kum 2004-05 season aṭang khan Serie A-ah hian Opta Sports (statistics) mumal taka chhinchhiah a nih hnua goal luh tlai ber a ni. Inter hian match 25 aṭanga point 46 hmuin pathumna an ni a, an hnuaiah hian an hmelma AC Milan (45points) an awm.