Bagan chungchangah Bencherifa a ṭawng chhuak

Tun season I League-a champion ngei tura beisei Mohun Bagan chuan Pathianni khan 3-1 in Trau an hneh a, I League-a club record an lo siam tawh chu an nihrual - match 12 chhung chu tlawm an nei tawh lo.

Bagan hian 2008-09 season khan Karim Bencharifa enkawlna hnuaiah league match 12 chu a zawna tlawm loh an lo nei tawh a, rei tak hnuah he record hi an nihrual ve leh ta chiah. Bencherifa chuan, "Match 12 chhung tlawm lo tur chuan player ṭha, fitness ṭha, thawhhona ṭha leh team inlungrualna a pawimawh a, hei vang hian Bagan hnathawh hi a ropui hle," tiin a sawi. 

Moroccan coach hnuaiah Bagan hian 2008-09 season-ah Federation Cup, Super Cup leh Calcutta Football League nomawi an chawi.Salgaocar tan pawha I League nomawi lo chawi tawh coach chuan, "Khatihlaia I League kha a hautak zawk. Churchill Brothers, Dempo, Mahindra United leh East Bengal an ṭha em em a, Jose Ramirez Barreto, Bhaichung Bhutia, Odafa Okolie, Yusif Yakubu leh Ranty Martins te ho an la awm bawk a ni," a ti. 

Vawiinah I League inkhel pahnih a awm dawn. Real Kashmir chuan chawhnu dar 2:00-ah Neroca an mikhual ang a, Trau chuan tlai dar 5:00-ah Churchill Brothers an mikhual dawn bawk.