United khelmualah Liverpool chak zo lo

Old Trafford-ah Liverpool-in point lia Manchester City tlanchhiat sanna remchang nei mah se an hun ṭha neih an chhawr thei lo a, Manchester United nen goal khung loin an inhnehtawk. 

United hian first half-ah hliam vangin an substitution neih an hmang zo vek a, Liverpool dinhmun a ṭha sawtah ngaih a ni. Mahse, Reds hian hliam vanga Roberto Firmino an chân ve tho avangin an attacking football hmuhnawm hmuh tur a awm lo a, point khatah an lungawi a ṭul. 

Liverpool boss Jurgen Klopp chuan, "Kan khelh hma aiin point khatin kan sang sawt a, mahse kan khelh dan avangin hlawkna telah kan inngai lo," a ti. Ole Gunnar Solskjaer pawh result-ah a lawm bik lo. 

Liverpool-in Old Trafford an lenluh hmain Klopp-a'n an khingpui manager Solskjaer a fak a, Red Devils manager lailawk chu season tharah manager nghet a nih lohna chhan tur a hriat loh thu a sawi. 

Norwegian coach hian Tottenham, Arsenal leh Chelsea hneh vek tawhin fiahna 'ṭhenkhat' chu a paltlang tawh a, an hmelma kumhlun Liverpool hi hneh ngat se a tan season thara United manager hna hi a chiang tlukah sawi theih a ni ang. 

Mahse, United beisei angin thil a kal lo. Inrinni zing khan training-naah Nemanja Matic a inhliam a, Solskjaer-a'n United a enkawl hnuah a vawi khat nan Scott McTominay chuan inkhel bul a ṭan phah.  

Minute 21-na lekah Ander Herrera chu hliam vangin lakchhuah a ngai a, minute li hnuah Juan Mata chu hliam vang bawkin lakchhuah a ni - a aiah Jese Lingard luhtir a ni a, English forward hi inhliam ve lehin minute 43-naah Alexis Sanchez chuan a thlak. 

Hliam vanga an talbuai viau chungin Ole hnuaia United hian fiahna an paltlang tiin a sawi theih a, inkhel hmuhnawm tia sawi tur ni lo mah se chak phu zawk an awm a nih chuan mualneitu team hi chak phu zawk an ni. 

Jesse Lingard-a'n khelmualah minute 17 chauh hun a hmang hman chungin he inkhela chance hlauhawm ber a nei a, mahse Liverpool keeper Alisson chuan 

ṭha zetin Lingard hi a lo dang hman. 

Liverpool defender Joel Matip-a'n Chris Smalling ball pet anmahni lamah a tilut a, United-in goal an khung emaw inti mah se offside phar a ni. Smalling vek hian goal khungna remchang tak a nei chungin Lukaku cross ṭha zet chu a pet hman lo bawk. 

United hian game hmuhnawm tak pholang bik lo mah se a khel ṭha zawk an ni a, Premier League hmahruaitu an chelh theih bawk avangin Solskjaer hian fiahna a paltlang tia sawi theih a ni. 

Old Trafford-a inhnehtawk hi result chhia tia sawi tur ni lo mah se Liverpool khelh dan enin fan-te tan lungawina tur a tlem. Minute 90 chhungin target-ah shot vawi khat chiah an nei a, Daniel Sturridge-a shot a ni. 

United-in second half-ah an ṭhat dan berin an inrem lo tih inhriain tawlh hnun an thlang a, tlarhnung inrem ṭha tak karah Reds tlarhma ten tâl pût dan an hre lo - ball an chang tam chungin Red Devils fans tan thin phut zawkna tur a awm lo. 

Liverpool hian chhuanlam tur an nei a nih chuan Firmino inhliam kha chhuanlam theih tak a ni. Brazilian forward thlaktu Sturridge hi 'hman' ang kha a ni tawh lo tih a chiang a, Sadio Mane leh Mohamed Salah hmuh tur an awm meuh lo bawk. 

Klopp tana luhaithlak tak tur chu tlarhnung inremphui tak team lakah Reds tlarhma ten chet ngaihna an hre lo ṭhin hi a ni - defensive team an la hmachhawn chauh hmel a, chinfel dan a ngaihtuah vat a ṭul ang. 

United manager Solskjaer chuan, "First half-ah khan kan chhiat theih dan tur hlir kha a thleng a ni ber a, Marcus Rashford pawh kha hliam nei chungin a khelh chhuah a ngai a ni," a ti.

Norwegian coach chuan sawi zawmin, "Liverpool-in chance pangngai an neih awm ka hre lo a, David de Gea khan tih tur a nei lo. Scott McTominay a khel ṭha a, goal khung mamawh avanga Mohamed Salah an la chhuak a nih chuan Luke Shaw khan a khel ṭha tihna a ni bawk," tiin a naute a fak.

Liverpool boss Klopp chuan, "Point hlawh chhuak emaw point hnih hloh angah kan inngai thei. Kan duh ang takin bul kan ṭan a, mahse inhliam tam lutuk khan engkim a tibuai a ni. 

"Chance kan insiam meuh lo a, United pawh khan vawi khat bak sawi tur an nei lo - a dang zawng kha chu set piece vek a ni. Dik taka sawi chuan kan khel ṭha tawk lo a, chu chu kan pawm a ni," tiin chak an phu loh thu a sawi.