India-in Pakistan a hmachhawn duh lo

Cricket mai ni lo infiamna khawvela team inhal ber pawl chu India leh Pakistan an ni - team pahnih hi kumin Cricket World Cup-ah June 16 khian an inhmachhawn a ṭul dawn. 

Mahse, khawvelin he inkhel tur hi nghakhlel taka a thlir laiin India rama cricket thuneitu sang ber Board of Control for Cricket in India chuan Pakistan hmachhawn an duh loh thu an sawi a,  International Cricket Council chu Pakistan hi World Cup aṭanga paih chhuak turin an ngen!

BCCI-in Pakistan hmachhawn an duh lohna chhan hi tun hnaia Pakistan-a inkulh firfiak pawl Jaish-e-Mohammad-in thihchilh bomb hmanga Pulwama-a CRPF mi 46 ngawt an thihchilh vang a ni a, BCCI chuan firfiakte chet tlatna ram nena inkhelh ho an duh loh thu an sawi. 

BCCI hian thuchhuah siamin, "Tun hnaia firfiakte chet dan ngaihtuahin ICC inelna a bik takin World Cup-a player leh match official te dinhmun hi a him lo hlein kan hria a ni," an ti a, firfiaka chetna a thlen mai an hlau. 

"ICC hnuaia ram tam zawk hian firfiaka chetna an dem em em a, chutiang firfiak mite chet tlatna ram nen chuan an inzawmna zawng zawng chhu chat turin kan ngen bawk," tiin cricket ram dang thlawpna an dil zui.

Pulwama-a firfiak chetna avang hian fans zingah Pakistan hmachhawn duh lo an tam hle a, player zingah pawh hmachhawn  duh lo an tam zawk nia sawi a awm - he thu buatsaih a nih lai hian ICC chhanna lam a la hriat loh. 

ICC hian BCCI duh dan takin Pakistan hi World Cup aṭanga an paihchhuah mai a rinawm lo a, chumi awmzia chu Men in Blue (India sawina) hian World Cup-a Pakistan hmachhawn loh luih chu duhthlanna an neih awmchhun a ni. 

Mahse, India hian Pakistan hi a hmachhawn duh lo a nih chuan India hi point paihsak an ni dawn tihna a ni a, World Cup-a a zawna vawi ruk ngawt Pakistan an hneh tawh record chu a tawp nghal bawk ang. 

India legend Sachin Tendulkar chuan, "World Cup-ah Pakistan kan ngam fo a, kei chuan hneh leh ngei hi ka duhdan ber a ni bawk - hmachhawn loha hlawk tir ringawt hi ka duh lo. Mahse, ka ram hi a hmasa berah ka dah fo a, India hian Pakistan a inkhelhpui duh ta lo a nih pawhin ka thinlung zawng zawngin ka thlawp ang," a ti. 

Kum 2015 Cricket World Cup-a India leh Pakistan an inhmachhawn ṭum khan Adelaide khawpuia inkhel hi a hmunah mi 53,000 in an en a, khawvel pumpuiah TV aṭangin mi tluklehdingawn 1.2-in an en bawk. 

June 16-a an inhmachhawnna tur hmuna ruahman Old Trafford Cricket Ground atan hian ticket 25,000 chu mipui vantlang tan zawrhchhuah a ni dawn a, he thu buatsaih a nih lai hian a hmuna en duhin mi nuai nga velin dilna an thehlut tawh!

Heng zawng zawng ngaihtuah chuan India hian Pakistan an hmachhawn lo tak tak a nih chuan ICC tan channa nasa tak a ni dawn tihna a ni a, a rang lama he buaina hi chinfel dan an ngaihtuah a ṭul ang. 

India captain Virat Kohli pawh a ṭawng chhuak a, tun lai khawvela batsman 'hot' ber pawl chuan, "Kan dinna chu a chiang reng. Kan ramin ti tura min duh leh BCCI duhdan zela kal hi kan duh ber chu a ni," a ti. 

Kohli chuan sawi zawmin, "Sorkar leh board-in ti tura min duh apiang kan ti dawn a, an thutlukna chu zah takin kan zawm dawn a ni," a ti. 

India captain ṭawngkam aṭang chuan player-ten BCCI hmalakna an thlawp tih chiang takin a lang a, Pakistan hmachhawn lo tura thutlukna an siam a nih pawhin lungrual takin an zawm dawn tihna a ni.

Kum li dana khel ṭhin Cricket World Cup hi May 30 khian khelh ṭan a ni leh dawn ta a, July 14 thleng a awh ang. He inelna hi England leh Wales-in an inthlen ṭawm tur a ni dawn a, team 10 an inhmachhawn dawn.

World Cup-ah hian a thlengtu England chu tling chiang sa an ni a, anni bakah hian September 2017-a  ICC One Day International ranking-a top seven South Africa, India, Australia, New Zealand, Pakistan, Bangladesh leh Sri Lanka chu a tling chiang sa an ni a, qualifier hmangin Afghanistan leh West Indies an tling ve leh bawk.

Team 10-te hi group-ah ṭhen hrang loin an inkhel kual vek ang a, a tawpah a sang pali hian semifinal lutin an inhmachhawn ang - India tan Pakistan hmachhawn loh 'luih' hi a pawi thui thei dawn tihna a ni. 

India leh Pakistan boruak lian tak hian cricket chauh ni loin infiamna dang pawh a nghawng tel zel a,  International Olympic Committee chuan India chu anmahni hnuaia infiamna reng reng thleng thei lo turin a hrem a, India nena inbiakna kal lai zawng zawng pawh a ti tawp!

IOC-in hetianga thutlukna a siamna chhan hi International Shooting Sport Federation hnuaia Shooting World Cup thleng mek India sorkarin Pakistani shooter pahnih visa a pek duh loh vang a ni a, he thil avang hian he inelna hi Olympic qualification status a nihna pawh tihtawp a ni nghal. 

IOC chuan thuchhuah siamin, "IOC executive board chuan he thil avang hian India leh an sorkar nena infiamna leh Olympic lam hawi inelna thlen a tum chungchanga inbiakna zawng zawng chu thu leh awm hma zawng atan a titawp a ni," a ti.