Klopp-a'n Lovren dem a duh lo

Liverpool boss Jurgen Klopp chuan rin loh taka Watford laka an tlawm avanga dem hlawh tak Dejan Lovren a chhan a, a defender chu an result chhia avanga dem bik tur a nih loh thu a sawi. 

Klopp chuan, "Watford kan ngam loh avanga Lovren dem bik an awm a nih chuan kei chuan tih theih ka nei lo," a ti - inkhelh zawhah khan Watford goal thumna khungtu Troy Deeney chuan Lovren chu Reds chak lohna lai a nih avanga an bi tum bik thu a sawi a ni. 

Lovren hi tun season-ah hliam vangin a inlan tam lo. Klopp chuan, "Dejan leh Joel Matip ten tlarhnung laiah ṭha takin an khel ṭhin. Mahse, inhliam dam chhoh leh lai tak hian insiamrem a harsa ṭhin a ni. Watford lakah khan ka player khel ṭha an awm lo," a ti a, Lovren chu dem bik a duh lo. 

Hetihlai hian tunlaia hri leng lar tak coronavirus vangin infiamna hun leh hmun tam tak sawn a ni a, khawthlang media ṭhenkhat chuan Premier League a nghawng chuan match khel zo loa Liverpool an champion loh theih thu an sawi. Klopp chuan, "Thawnthu danglam tak a ni. Ka chhiar hmasak ber chuan engtin nge heti zawng hian an ngaihtuah theih zawk? tiin ka inzawt hial. Hetiang thu mak lutuk awih tur khawpin Liverpool fans an mawl lo," a ti!