Chungnung zawk nih inchuhna Khatla TBL hmaah Zarkawt BCA

Infiamna khawvelah chuan club inhal leh inel bik an awm zel, tu pawhin chungnung zawk nih an duh avangin an inel boruak a sang ṭhin hle - khawvel kalphung pangngai a ni. Tualchhung basketball huangah pawh Khatla TBL leh Zarkawt BCA ten a ṭha leh ropui zawk nih an inchuh mek.

Mizoram Super League season 6 kal laiah team ṭha pahnih hi zanin dar 6:30 hian an intawng dawn. Hawla Indoor Stadium, Republic Venghtlangah basketball hmuhnawm en duh chu kal mai tur a ni, a hmuna en thei lo tan Zonet-ah en theih a ni bawk ang.

Tualchhung basketball inelna sang ber MSL-ah Khatla TBL hi season hmasa pahnihah an champion a, season thumnaah Mission Veng Vikings chuan an rorelna an ti tawp - season hnuhnung pahnihah Zarkawt BCA chu chiang takin an champion thung.

MSL-ah vawi thum champion thei an la awm ngai lo - TBL leh BCA ten sulhnu ropui hi hnutchhiah an tum mek, kuminah league match hnih an khelh tawhah hnehna an chang ve ve. League round-ah vawi khat chauh an intawn dawn avangin a chung bera awm tur chuan zanina chak a pawimawh.

Season kal laiah Zarkawt BCA hian Season Opening Tournament leh MBBA Cup-ah TBL hnehin nomawi an chawi a, zaninah pawn rinkai zawk an ni ang. MBBA Promotional Tour-ah erawh BCA hi semifinal-a an tlak laiin TBL an champion thung, an inhlau lo tawn ang.

Khatla TBL-in Chanmari Vikings leh Chawnpui BC an hneh tawh a, an match hmasa pahnihah hian Xavier Dupree chuan point 30 chuang ve ve a nei thei, zaninah Zarkawt BCA tana ven ngun ngai bik tur a ni dawn.

Coach Lalrinzuala chuan, "Match hmasa aiin zanin chuan court chhungah hun a hmang tam zawk tawh turah ka ngai," tiin American forward chungchang a sawi. TBL hian Tuikual South tana khel tawh Rakesh an lathar bawk a, Haryana tlangval hi nimin khan a rawn thlen chauh avangin zaniah a inlan a rinawm loh.

Dawrpui Vengthlang tlangval Rina chuan an khingpui tur chungchang sawi zawmin, "Ka naute an thawkrim em em a, an theihna sang tak anga an khel chuak a nih chuan hnehna kan chan theih ka ring, chak tur erawh chuan vanneih tel a ngai," tiin Vanglaini a hrilh.

India tana khel tawh H. Laldinsanga (Mapuia) a la awm a, Saron Veng tlangval bakah hian Eddie Zaithanmawia leh Vanlalrinchhana ten season duhawm an hmang, anni pathum leh Dupree inkawp chu BCA hneh turin an ṭha tawk.

Lalrina Renthlei, Zonunsanga leh Matthew Remtluanga Sailo awmna Zarkawt BCA tan tualchhung team dang hmachhawn huphurhawm an awm lo ang, coach Lalruatfela erawh a ṭawng fimkhur hle.

BCA coach Afela chuan, "Chak chiang a awm thei lo, a bik takin TBL hi chu a harsa dawn. MSL khel chin chu an ṭha vek, kan match hmasa pahnihah pawh hnehna chang mah ila team dangin theihna an nei sang tih kan hmu," tiin

Vanglaini a hrilh.

Gujarat tlangval Sahaj R. Patel hoin Ramhlun an hneh a, an match hnihnaah Tuikual South an hneh ṭumin Malik Price Martin pawh a inlan tawh - Florida forward hian TKS lakah point 24 neiin MSL-ah a hming a nemkai, zaninah eng ang taka ṭha nge a nih a lang ang.

Champion lai BCA hi team ṭha an nih zia inhrilh nawn a ngai lo. Amaherawhchu, Phengphehlep nen an inkhelh ṭumin fal taka hma an hruai tawh hnuah a tawp lamah an talbuai, a tawpah an chakna chu 87-85 chauh a ni; TBL lakah chuan inthlahdah zeuh a pawi thui thei dawn.