Napoli mualah Barcelona an vannei

Barcelona-in Champions League match an khelh a, an khingpui an inhnehtawkpui a, 'vannei' tih ṭawngkam hman a ngaih chuan he team dinhmun hian hniam lam a pan zel tihna a ni. 

Thawhlehni zan Champions League inkhelah Barcelona hian Napoli chu 1-1 in an inhnehtawkpui a, khel ṭha lo zawk mah se away goal hlu tak an neih avangin quarterfinal luh beiseina an nei sang hle. 

Champions League round of 16 first leg inkhelah hian Napoli tan Dries Merten chuan minute 30-naah goal hmahruai a khung a, Marek Hamsik (121 goals) bulah a hming nem kaiin Napoli tana goal khung hnem ber record a nihrual. 

Barcelona tan Antoine Griezmann chuan minute 57-naah an si phurh a sut a, minute 89-naah Arturo Vidal chu hnawhchhuah zui ni mah se Napoli tan player tam zawk nih chhawrna hun a awm tawh lo. 

Italian club Napoli-in December khan Genk chu 4-0 in an hneh a, darkar thum hnuah coach Carlo Ancelotti an ban zui. Everton boss ni zui ta an ban hnuah hian Gennaro Gattuso an lalut. 

AC Milan midfielder hlui hnuaia an match hmasa parukah vawi li an tlawm a, mahse Barca tum hmaa inrintawkna nei hmanin an match hnuhnung pathumah an chak vek. 

Barca goal nawr na dawl zo turin Napoli an inrem phui a, 4-1-4-1 formation an hmang a, Barca an tlang thei lo - Serie A club-in goal an khung hmasa zui a, yard 18 vela hla aṭangin Mertens chuan goal hmahruai hi a khung. 

Mertens hian tun season-ah match 28 khelin goal 12 a khung tawh a, 2013-a Italian club a zawm hnuah season khata goal 10 aia khung tlem a nei lo. 2016-17 kha a season ṭha ber niin match 46-ah goal 34 a khung a, Hamsik-a'n Napoli tan a khelh tawh loh avangin Italian club tana goal khung hnem ber record a siam ngei a rinawm. 

Kar hmasa khan Barca captain Lionel Messi chuan, "Tuna kan khelh dan en hi chuan Champions League nomawi chawi nan a tawk lo," tiin a sawi a, a team a ring tawk lo.

Messi hi dem theih a ni lo - a thusawi dikna chen a awm. Catalan club hian season an hmang chhe takzet. Copa del Rey-ah an tla tawh a, La Liga-a an hmahruai chhan hi Real Madrid leh Atletico Madrid beisei phak loh vanga chhiar theih a ni. 

Napoli lakah pawh an che hleithei lo - Griezmann-a'n goal a khung kha target-a shot an neih hmasak ber a ni a, minute 90 chhungin target-ah shot vawi hnih chauh an nei hman. 

Barcelona coach Quique Setien erawhin lawmna tur a hmu tho. Setien chuan, "Kan mualah kan la khelh leh dawn avangin result ṭhaah ka ngai a ni," a ti a, away goal an neih avangin a inringtawk. 

Barcelona lakah Napoli an vanduai tiin a sawi theih. Griezmann-a'n si phurh a sut hnuah Napoli-in na takin Barca an nawr a, Lorenzo Insigne leh Jose Callejon-te hun ṭha neih chu goalkeeper Marc-Andre ter Stegen chuan ṭha zetin a dan sak. 

Italian club hian 1-0 a hma an hruai laiin si hnih faia hmahruaina remchang an nei bawk a, mahse Kostas Manolas chuan a hun ṭha neih a hlah. Napoli boss Gennaro Gattuso chuan, "Vawi khat lek ruahman angin thil a kal lo a, min hrem zui a ni," a ti a, Barca vanneih thu a sawi. 

Mahse, Barca tan second leg-ah beisei angin thil a awlsam dawn lo. Fabian Ruiz laka a foul avanga  hnawhchhuah Arturo Vidal chuan second leg a khel thei dawn lo a, Sergio Busquets chuan tun season-a a yellow card pathumna a hmuh avangin a khel thei lo bawk ang. 

Setien chuan, "Busquets emaw Vidal kan chhawr thei dawn lo a, mahse insiamrem dan kan zawng ang," a ti. Hetihlai hian Napoli captain Lorenzo Insigne chuan, "Hnehna chang thei kan ni a, kan hnual hle a ni," a ti a, an chak zo lo chu a ui hle. 

n    Barcelona hi Champions League knockout stage-a khualmuala an tlawm lohna match hnuhnung 19-ah an tlang vek. 

n    Gennaro Gattuso leh Quique Setien tan Champions League-a team an kaihhruai hmasak ber a ni a, Champions League-a a vawi khat nana inlan manager pahnih an intawn hmasak ber a ni. 

n    Napoli striker Dries Mertens chuan tun season Champions League-ah goal ruk a khung tawh a, Napoli tana European Cup/Champions League season khata goal khung hnem ber record a ni. 

n    Barcelona forward Antoine Griezmann-a'n February 2017 (Atletico Madrid tan a khelh laia Bayer Leverkusen laka a khung) hnua a vawi khat nan khualmualah Champions League goal a khung a, a hmaa a goal khung hnuhnung pakua chu mahni muala a khung vek a ni. 

n    April 2011 khan Barca goalkeeper Pinto chu Real Madrid lakah hnawhchhuah a ni a, Arturo Vidal chu Pinto hnua Champions League knockout stage-a Barcelona player hnawhchhuah ni leh hmasa ber a ni.