Zaninah Premier League inkhel hmuhnawm a awm dawn

Stamford Bridge-ah zanin dar 1:30 hian Chelsea-in Tottenham Hotspur an mikhual dawn. League Cup final-ah Blues manager Maurizio Sarri-a'n keeper Kepa Arrizabalaga a thlak theih loh avangin zanin Premier League inkhel hian ngaihven a hlawh sawt ang.

Champions League khel tura Chelsea elpui Arsenal-in Bournemouth an mikhual dawn a; Manchester United-in Selhurst Park-ah Crystal Palace an tlawh dawn.

Chelsea chuan keeper Kepa chu a kar khat hlawh chawi tura tih a ni. Spanish keeper hi kar khatah £195,000 bawr vel a hlawh avangin India pawisa chuan nuai 180 vel a chawi dawn tihna a ni.

Kepa chuan, "Inhriat fuh loh vang a ni nachungin ka chet dan a dik lo a, ngaihdam ka dil a ni," tiin a sawi.

Khawvel keeper manto ber hian hremna chu a tawng ngei a, amaherawhchu inkhel thei lo tura hremna erawh a tawk dawn lo niin a lang.

Chelsea boss Sarri chuan, "Kepa hian a tihsual hi a hria. Ka bulah, a khelhpuite leh club chungah ngaihdam a dil a, sawi zui tur a awm tawh lo," tiin a ngaihdam thu a sawi a, Spurs nen pawh a inlan ngei rin a ni. Kum 24 mi Kepa pawisa chawi hi Chelsea Foundation-ah a lut ang.

Tottenham-in Harry Kane-a telin Burnley an hneh lo a, Chelsea laka an tlawm nawn a nih chuan nomawi thlir tawh loin Champions League khel lo thei dinhmunah an ding dawn.

Chutihrualin Spurs khingpui tur Chelsea hian Man City an khing tawk a, an keeper Kepa chet dan mawl takin Blues khelh ṭhatna a hliah khuh a. Stamford Bridge-ah mimal chet dan ni loin inkhel a pawimawh dawn a, pathumna dinhmun hauhtu Tottenham hi player aṭanga thlir chuan Chlesea aia an buk ritna zawk a awm lo.

Blues hian League Cup final thleng turin Tottenham hi semifinal-ah an hneh a, Premier League-a an intawn hnuhnun berah erawh Poch-a hote 3-1 in an chak thung.

Manchester United-in Leicester City muala 4-1 zeta chak thei Crystal Palace an hmachhawn dawn a, Ole Gunnar Solskjaer hote hi hliam vangin an dinhmun a ṭha lo. United hian senior player 10 zet inhliam an nei a, Marcus Rashford erawh inkhelh hmaa a dinmun a zirin khelhtir a ni dawn.

Untied boss Solskjaer chuan player naupang zawk Angel Gomes, Tahith Chong leh Jimmy Garner te a hruai tel tur thu a tichiang a; Norwegian manager chuan Romelu Lukaku leh Alexis Sanchez te chu midang inhliam hmang ṭangkai turin a duh.

Palace lamah United player hlui Wilfried Zaha chu player pawimawh niin Michy Batshuayi leh Luka Milivojevic te nen mikhual tlarhnung tan buaina tham an tling ang.

Unai Emery enkawl Arsenal hian Emirates Stadium an hmang thiam hle, inelna hrang hranga an match hnuhnung 12-ah hnehna an chang vek. Zanina an khingpui tur Bournemouth hi khualmualah an hneh tawh a, palina dinhmun sawhnghet theihna hun ṭha a ni thei ang.

Match hnuhnung berah club top scorer Pierre-Emerick Aubameyang chu bench-ah dah niin hun tawp lam minute 15 chhung chauh chhawr a ni a. Gabon international hi Europa League lama chhawr a nih vangin hahchawlhna hun pek nia ngaih a ni a, zaninah erawh Alexandre Lacazette nen an inkawp a rinawm.