Dr T. Ao U21 Football Semifinal Vawiin tlai dar 5-ah Mizoram Vs Arunachal Pradesh

2nd Dr T. Ao North East International NEC Gold Cup Under 21 Football Championship-ah Mizoram chuan vawiin tlai dar 5:00 hian semifinal-ah Arunachal Pradesh an hmachhawn dawn.

Dar 2:00-ah Sikkim leh Meghalaya ten final luh an inchuh bawk ang.

Mizoram hian Dr T. Ao Football kum bithliah inelna hi an vawi khat khelhna a ni a, nikum khan inelna hi ṭan a ni. Tun ṭumah hian semifinal hi SAI Ground, Guwahati-ah khelh a ni dawn a, DD Sports-ah live telecast-a pekchhuah beisei a ni.

Mizoram dinhmun

Mizoram hian semifinal thleng tur hian Meghalaya (3-3) nen an inhnehtawk tih loh chu hnehna an chang vek a; Manipur (1-0), Nagaland (4-1), Nepal (3-0) leh Tripura (4-0) laka point thum hlawh chhuak turin harsatna an tawk lo.

Amaherawhchu Mizoram hian semifinal-ah damloh vangin left back Vanlalnghenga bakah inhliam vangin winger pahnih K. Roluahpuia leh Lalhmingchhuanga Hauhnar te an chhawr theih a beiseiawm loh.

Mizoram coach Vanlalpeka Ralte chuan, "Arunachal hmachhawn tur hian duh ang thlap chuan kan inrem thei dawn lo a, chutih rualin chhawr theih tura awmte hi ka ring tawk hle," tiin Vanglaini a hrilh.

Tun ṭumah hian MPL hnuhnung bera Chanmari FC tana goal ruk zet khungtu Lalnunzama chuan goal a la khung lo a, coach Peka chuan, "Khelo India-a Mizoram team khelh dan hmang leh tun ṭuma kan khelhtir dan hi a dang hret a, an la hrethiam tawk lo pawh a ni thei ang. Semifinal thleng tur hian match nga kan khel a, tawnhriat nei ṭha hi chu stage sangah a pawimawh ṭhin," tiin goal a khung a beisei thu a sawi.

Engtin zel?

Mizoram manager Peter Lalzawmliana chuan, "Arunachal hian tun hnaiah hma an sawn em em a, zuam ngawt tur an ni lo. Semifinal lut turin Bangladesh an hneh a, kan fimkhur a ṭul," tiin Vanglaini a hrilh.

Arunachal Pradesh hian nikum kum tawp khan Mizoram hi Sub Junior-ah an hneh tawh a, Under 21 inelnaah pawh an tawh a khirh ang. AP hian an state player bakah SAI aṭangin player ṭha an la nual a ni.

Peter-a chuan, "Team inlungrualna a ṭha a, Guwahati-a Mizo awmten min ṭawiawm ṭha a. Mizoram House LO Pu Donny-a'n chawhlui min kilpui bawk a, inhliam neuh neuh chu nei mah ila semifinal hmachhawn tur hian kan inpeih," a ti.

Mizoram team hi manager Peter, coach Peka, asst coach Timothy Vanlalchhuanga Ngente leh asst manager NC Hmingthanzuala ten an enkawl a ni.