MiMSA rider Lalmama tan chawimawina

Federation of Motor Sports Clubs of India (FMSCI) 2018 Annual Awards chu Thawhṭanni zan khan Mumbai-ah sem a ni a, Malsawmdawngliana (Lalmama) hnenah 'Outstanding Achievement In World Motorsport' hlan a ni.

Season hmasa khan Lalmama hi JK Tyre FMSCI National Racing Championship zinga pakhat Suzuki Gizzer Cup-ah pahnihna niin, FIM Asian Cup of Road Racing-ah India aiawh a inlanin a champion bawk. 

Mizoram Motorsports Association (MiMSA) hnuaia tualchhung inelna hrang hrangah pawh hlawhtlinna tam tak a chang tawh bawk.

Kanan Veng tlangval Lalmama chuan, "Pathian chungah ka lawm, hetiang dinhmun kan thlen theih nana hma min lak saktu pawimawh MiMSA chungah ka lawm takzet a, fuihna ṭha tak tak min petu B Lalruatsanga (RS-a) chungah ka lawm bawk.

"Inelna hmachhawn hi a hautak a, min sponsor-tu Siby's Firm bakah LBS Suzuki leh Mizoram State Sports Council chungah lawmthu sawi sen loh ka nei bawk. Hun harsa leh hrehawm ka paltlang lai pawha min thlahtlam ngai lotu ka chhungte chungah thinlung takin ka lawm hle a ni," tiin Vanglaini a hrilh.

FMSCI Annual Awards-ah hian chawimawina hrang hrang 61 ngawt sem chhuah a ni a, khawvela motosports lama thuneitu sang Federation Internationale de l’Automobile (FIA) president Jean Todt pawh hman puitu zingah hian a tel. Todt chuan, "India ramah hian infiamna in hma a sawn nasa hle, a bik takin motosports hi tun hnaiah a ṭhang hle," a ti.

MiMSA president Vanlalmuana pawhin an rider Lalmama'n chawimawina a dawng thei chu an lawmpui thu a sawi. 

Muantea chuan, "Mizo rider tam takin an nu leh pate hnen aṭangin thlawpna an dawng ṭha tawk lo a, Mama erawhin kawng engkimah a nu leh pa te thlawpna a dawng thung. Naupangte hi an theihna kan tuipui chuan sang tak an thleng thei a ni," tiin Vanglaini a hrilh.