Copa del Rey semifinal-ah El Clasico Barcelona dinhmun a derthawng

Zanin dar 1:30-ah El Clasico inkhel en tur a awm dawn. Copa del Rey semifinal second leg-ah Real Madrid chuan Barcelona an mikhual dawn a, champion lai Barca hi dinhmun derthawng zawk an ni. 

Nou Camp-a an intawn hmasakin team pahnih hi 1-1 in an inhnehtawk a, khualmuala goal khungtu Real tan final lut turin goal chhuah loh a tawk tihna a ni - Santiago Bernabeu-ah an la khel dawn zui. 

Mahse, thawnthu hlui keu let chuan Real tan Bernabeu-a Barcelona mikhual hi ngaih ngamna chi niin a lang chuang lo - Spanish Super Cup tih lohah chuan October 2014 hnu lamah khan Barcelona an mikhual apiangin hnehna an la chang ngai lo. 

Semifinal lehlamah Valencia leh Real Betis an intawng dawn bawk a, Betis khelmuala 2-2 a lo inhnehtawk tawh team hi Ningani zanah an intawng dawn thung. 

Real fan-ten Copa del Rey hi an beisei neihchhun anga sawisak chu an haw viau mai thei a, mahse thudik niin a lang tlat si.

Madrid khaw club hi tun hnaia an khelh dan enin Champions League nomawi chawi tur chuan rin an harsa a, La Liga-ah lah hmahruaitu Barca chu point kua ngawtin an thlau mek. 

Hei vang tak hian Real hian hnehna chan ngei tumin theihtawp an chhuah ang tih a chiang a, tlarhmaah Vinicius Junior leh Karim Benzema te an pawimawh sawt dawn tihna a ni. 

Real-in league match hnuhnung berah Levante chu 2-1 in an hneh a, he inkhela hrem vanga inlan lo captain Sergio Ramos chuan tlarhnungah Real a ho leh 

tawh ang. 

Levante nena an inkhelah hian Gareth Bale chu bench-ah dah a ni a, Welsh forward hi bench aṭanga luhtir a ni chungin coach Santiago Solari lakah a lungawi lo - penalty a khung pawhin a lawm duh lo. 

Mahse, Solari chuan, "A goal khung lawm danin minti buai lo a, a rilru puthmang hi ka duh zawk chu a ni," tiin Bale a sawisel duh lo a, zaninah inkhel bul a ṭan a nih pawhin a mak lo ang. 

Real tan Copa del Rey hi nomawi beisei awmchhun anga sawi theih a nih laiin Barcelona erawhin treble champion nih ngei an tum a, an player chhuanvawr Lionel Messi pawhin hei hi a zep lo. 

Messi chuan, "Eng inelna pawh kan la thutak vek a, nomawi chawi theih zawng zawng chu chawi kan tum vek. Copa del Rey-ah phei chuan final lut turin match khat chiah kan mamawh tawh a ni," tiin final luh a tum hle. 

Tun season-a goal 33 khung tawh Messi hian Santiago Bernabeu-a match 19-a inlan tawhah goal 15 a khung tawh a, Ramos leh a ṭhianten hna an ngah dawn.