Diaby-a'n football chawlhsan

Arsenal midfielder hlui Abou Diaby chuan football a chawlhsan thu a puang. 

Diaby hian hliam a nei ngun a, kum 14 leh a chanve chhungin match 200 bawr bak a khel hman lo.

Kum 32 mi Diaby hian Arsenal tana a khelh laiin hliam tenau leh na deuh nen belhkhawmin vawi 42 a nei hman, chawlhkar 222 chhung chu inkhel thei loin hun a hmang a ni - player beiseiawm zingah tel mah se a ṭhatna tak angin a khel thei lo.

France international hlui Diaby chuan, "Tunah chuan ka professional career chu a tawp a hun ve ta. Taksa lama harsatna chi hrang hrang neih fo chuan ṭha taka khelh chhunzawm zel hi a harsa ṭhin a ni. Thutlukna siam harsa tak ni mah se ka tan chuan chawlh a hun tawh," tiin a sawi.