Mexico-ah Wawrinka

Stan Wawrinka chuan a hliam dam hnuah a tam thei ang ber inelna a hmachhawn chho zel, nimin zing khan Mexican Open-ah inlanin harsatna nei loin second round a in hlangkai.

Acapulco-a inkhelah Grand Slam vawi thum champion tawh Wawrinka hian a khingpui Ryan Harrison chu 6-4, 7-6 (8-6) in a hneh a, a match lehpekah chuan seeded pasarihna Steve Johnson nen an inhmachhawn leh ang. American tlangval Johnson hian Gerardo Lopez Villasenor chu 7-5, 7-5 in a lo hneh ve bawk a ni.

Inkhel dangah seeded pariatna John Millman chuan 6-3, 6-4 in Marcel Granollers a hneh a, ani hian Federico Gaio 5-7, 6-4, 6-2 a hnehtu Peter Gojowczyk a hmachhawn ve leh thung dawn. Seeded parukna Frances Tiafoe pawhin Jordan Thompson 3-6, 6-4, 6-3 in a hneh ve bawk.