James tan mellung pawimawh

LeBron James chu NBA player zingah point score hnem leh assist neih hnem lama a sang zual 10 zinga awm kawp thei hmasa ber a ni ta! James hian nimin zing khan Los Angeles Lakers tan point 24 a score bakah rebound vawi 12 lain assist ṭum 11 a nei bawk - mahse a club hi Memphis Grizzlies lakah 110-105 in an chak lo thung.

Kum 34 mi James hi NBA-ah chuan point score hnem lamah pangana dinhmun luahtu a ni mek a, nimin zinga assist vawi 11 a neih leh tak aṭang hian ṭhiante basket neih tur siamsak hnem lamah pawh 10-na a ni chiah, hetiang dinhmun luah kawp thei hi tun hmain an la awm ngai lo.

American forward James-a'n Memphis Grizzlies laka triple-double a neih chiah khan NBA chanchinah a vawi 79 neihna chiah a ni a, triple-double neih hnem lamah pawh pangana a ni nghal bawk.

NBA vawi thum champion tawh James chuan, "Mimal chawi-mawina hi a hluin a ropui ka ti a, chutihrualin kan team kan chak chuan loh chuan lawm a kim thei lo. Tun hnaiah kan khel ṭha tawk lo, tun season chhunga vawi 31 ngawt kan chak lohna a nih avangin eng tiangin nge kan thawhchhuah thuai ang tih hi a pawimawh lai chu a ni," tiin a sawi.

Nimin zing NBA regular season inkhel dangah Houston Rockets chuan Atlanta Hawks 119-111 in an hneh thung. Rockets tan James Harden-a'n point 28 a nei, Harden hian a zawnin match 32 chhung chu point 30 a nei tling ziah a, a record duhawm tak erawh a tawp thung.

American legend Wilt Chamberlain chuan tun hmain NBA regular season-ah hian match 65 chhung chu point 30 a zawnin a nei tling thei a, Chamberlain hnungah chiah Harden a awm. Harden chuan, "Hnehna kan chan avangin ka lawm, mimal record hi chu a tawp hun a la awm dawn tih ka hria, a chung bera awm tur ka nih rih lo," tiin a sawi.