Leipzig leh Hoffenheim inhnehtawk

27th February, 2019

Thawhṭan zan khan Bundesliga inkhel pakhat a awm a, season thara Champions League khelh tum RB Leipzig leh Hoffenheim te chu 1-1 in an inhnehtawk.

Mikhual team Hoffenheim lamin Leicester striker hlui Andrej Kramaric hmangin minute 22-naah hma an hruaina chu hun tawp dawnah Leipzig lamin Willi Orban hmangin an sut hram.

Leipzig hian hnehna chang ni sela chuan Borussia Monchengladbach lehpelin table-ah pathumna nih theihna hun ṭha an nei. Mahse, tunah chuan point 43 hmuin palinaah an lungawi rih a ṭul.

Kum 31 mi Julian Nagelsmann hian season hnih chhung chu Hoffenheim hi UCL a khelh pui tawh a, season tharah erawh RB Leipzig a enkawl tawh dawn.