Premier League nomawi: Liverpool ta tur nge City?

Premier League-ah match 11 chauh khelh hmabak a awm tawh a, a chung bera awm Liverpool leh Manchester City inthlauhna chu point khat chauh a ni bawk. 

Season tawpah tu kutah nge nomawi a awm dawn, tih chu zawhna langsar a ni mek a, vawi khat chetsualah team pahnih hi in tlansan thei an nih tawh avangin a chhanna pek erawh a harsa rih hle. 

Liverpool hian zanin dar 1:30-ah Watford an mikhual dawn a, City hian dar 1:30-ah vek West Ham an mikhual ve dawn bawk - team pahnihin an elpui result an ngaichang reng ang. 

Reds boss Jurgen Klopp chuan, "Table kan en chuan kan dinhmun a ṭha em em a, hei hi khelmual chhungah kan pholan a ṭul a ni," a ti a, hmahruaitu nih an phu zia pholang turin a naute a duh. 

Liverpool hian an match hnuhnung pangaah vawi khat chiah hnehna an chang a, an match hnuhnung pahnihah Bayern Munich leh Manchester United chu goal khung loin an inhnehtawkpui bawk. 

Reds khelh dan enin a Premier League hmahruaitu 'zia' lo a, Bayern leh United lakah goal an khung lo a ni mai lo a, chak phu khawpin an khel ṭha tawk lo. 

Tun hmaa Liverpool buai ṭhinna chu tlarhnung a ni a, tuna an buaina erawh goal khung an harsat hi a ni - Bayern lakah an hun neih an chhawr thei lo a, United lakah phei chuan chance mumal an insiam thei lo. 

Hetiang boruak karah hian Liverpool forward Roberto Firmino chu hliam vangin a inlan thei lo mai thei - United lakah hliam vanga lakchhuah a nih hnua Liverpool talbuai dan ngaihtuah chuan a ngaih ṭhat thlak loh. 

Liverpool player zingah Joe Gomez leh Dejan Lovren an la inlan thei dawn lo a, an match hnuhnung bera 5-1 ngawta Cardiff City sawp thei Watford lakah Reds tan fimkhur a fin thlak ang. 

Watford tan Cardiff laka hattrick siamtu Gerard Deulofeu chu player pawimawh a ni dawn a, Virgil van Dijk a awm dawn miau avangin awlsam taka Liverpool tlarhnung paltlang erawh a harsa dawn.

Bayern leh United laka 'bo' Mohamed Salah tan bo reng a hun tawh lo a, Premier League nomawi chawi a duh takzet chuan goal a khung ṭan leh tawh a ngai - Sadio Mane pawimawhna sawi nep theih a ni bik lo. 

Liverpool boss Klopp chuan, "Watford nena kan inkhel turah hian inbuatsaihna hun kan ngah tawk lo. Mahse, Anfield-a inkhel en tur kan ni a, fans tam takin min puih ka beisei a ni," tiin fan-te puihna a sawm. 

Liverpool-in point khatin hma an la hruai zawk chungin mi tam tak chuan Manchester City hi Premier League champion ni turin an beisei zawk - tun hnaia an khelh dan aṭanga teh chuan a awm lo hran lo. 

City hi League Cup nomawi chawi hlim an nih avangin an phur vanglai tak a ni a, an match hnuhnung 15-ah an chak vek bawk - Liverpool, Arsenal leh Chelsea te chu an hneh zingah hian an tel avangin an result hi chhuan tham a ni. 

Mahse, thil mak tak chu City hi tun season league-ah vawi li an tlawm tawh a, an ngam loh zingah club lian tia chhiar theih chu Chelsea chiah an ni - Crystal Palace, Leicester City leh Newcastle United lakah an tlawm!

Zanina an hmachhawn tur West Ham pawh hi zuam sual theih an ni ang tih a chiang a, 3-1 a Fulham hneh hlim an nih avangin Hammers hi an phur vanglai tak a ni bawk. 

West Ham boss Manuel Pellegrini hi City hrechiangtu a ni a, Manchester khaw club hi kum thum chhung a lo enkawl tawh - Etihad Stadium hrechiangtu hian fing takin a naute a rem thiam ang tih a chiang. 

City tana Premier League nomawi chawi tawhtu coach hian Liverpool an hmachhawn dawn khan a club hlui puih nan hnehna chan a tum tur thu a sawi a, tunah erawh a club leh Liverpool pui tura a inlan a ṭul ve ta thung. 

Pellegrini tan chanchin lawmawm a awm a, chu chu League Cup final-a inhliam Aymeric Laporte leh Fernandinho ten Hammers an mikhual thei dawn lo hi a ni. 

Pep Guardiola hman thiam player pahnih hi hun engemaw chen chu an chawlh a ngaih a rinawm a, hei hi tun match-a West Ham tan mai ni loin Liverpool tan chanchin lawmawm a ni tel.