Federer-a'n hnehna nen bul a ṭan

Roger Federer-a'n nomawi 100 lak tlin a tumna kawngah bul a ṭan fuh a, Dubai Tennis Championship-a a match hmasa berah Philipp Kohlschreiber chu a hneh nghal, vawiin hian Fernando Vardasco nen an inhmachhawn leh ang.

Thawhṭanni zan inkhelah Federer hian 6-4, 3-6, 6-1 in hnehna a chang. Australian Open last 16 aṭanga a tlak hnua a match hmasa berah Federer-a'n a service vawi hnih hloh mah se ṭum li ngawt a chhuhsak let thei a, atan bul ṭanna chhia a ni lo.

Grand Slam vawi 20 champion tawh Federer leh kum 35 mi Kohlschreiber te hi vawi 14 an inhmachhawn tawh a, hengah hian Federer-a'n hnehna a chang vek, vawi sarih a champion tawhna hmun Dubai-ah a hlawhtling leh a nih chuan he hmuna record nei ṭha ber a ni nghal ang.

Kum 37 mi Federer hian tennis a khelh hun chhungin nomawi 99 a chawi tawh a, ATP hnuaia inelna kalpui a nih chinah chuan American legend Jimmy Connors (109 titles) chiah ani aia nomawi chawi hnem a awm - world number 7 Federer tan umphak theih ni mah se a awlsam dawn lo.

Amaherawhchu, Federer hian season hnih chhung a inlan lohna clay court season hman a tum thu a ti chiang tawh a, Swiss thiampuipa hian hlawhtlinna lian leh ropui dang a chang chhunzawm a nih pawhin a mak lo ang.

Federer-a'n hnehna a chan lai hian seeded palina Karen Khachanov leh seeded pasarihna Milos Raonic te chuan Thawhṭanni zan khan an match hmasa berah seeded chang phak lo player ve ve an hneh lo.

Kum 22 mi Khachanov hi world number 19 Nikoloz Basilashvili lakah 6-4, 6-1 in a chak lo. Kum 28 mi Raonic pawh inkhel inhnehtawk takah 6-4, 5-7, 6-4 in Germany tlangval Jan-Lennard Struff lakah a chak lo bawk a ni.