Arsenal rawlthar rual an chak

Arsenal manager Mikel Arteta-a'n FA Cup-ah rawlthar rual khehtir chungin Portsmouth 2-0 in an luhchhuah a, harsa lutuk loin quarterfinal an lut.

Europa League aṭanga tla hlim Gunners hian Premier League-ah nomawi an beisei ngam tawh lo, tunah chuan football knockout tournament upa ber FA Cup hi tun season chhunga champion an beisei theihna awmchhun a ni tawh.

Thawhṭanni zana an inkhelhna Fratton Park hi tun hnaiah mikhual tana hmun ralṭi a ni a, League One club Portsmouth hian an khelmuala match 19 an khelh hnuhnungah chak loh an nei lo, tun hnaiah phei chuan a zawnin vawi 10 an chak.

Arsenal lamin inkhel thunun mah se Portsmouth an ṭang thei viau, chawlhlawk hma chiahin Sokratis Papastathopoulos chuan Reiss Nelson-a cross a pet lut. Second half tir lamah Nelson-a siamsak bawk chu Eddie Nketiah-a'n a khung leh.

Pompey lamin nawr let turin chakna an nei lo, substitute Ronan Curtis-a'n goal zawnah vawi khat a pet bak chu target zawna pet a nei lo. Kenny Jackett naute hian hnehna chan chu an duhthusam a ni a, chutih rualin FA Cup aiin an league khelh lai an ngaih pawimawh avangin player ṭha ṭhenkhat an khek.

Arteta-a'n Europa League lama a chhawr player aṭangin mi pakua ngawt a siksawi a, inkhel bul ṭantu zingah kum 20 hnuai lam paruk an awm. Defender Pablo Mari chuan a club thar tan a match hmasa ber a khel ve chiah.

Goal khungtu Nketiah a langsar a, goal vawi hnih siamsaktu Nelson chu fak phur ber a ni hial ang. Bukayo Saka leh Gabriel Martinelli te hian theihna an nei sang tih an nemnghet nawn, a vawi 14 nan FA Cup chawi an tum. Gunners manager Arteta chuan, "Player beisei awm tak tak ho nena thawhho hi nuam ka ti, a nihna takah chuan anni khelhtir hi risk a sang, chutih rualin enchhin an manhla hle a ni. Portsmouth hmachhawn a harsa dawn tih kan hre lawk a, kan inven theih avangin a lawmawm," a ti.

North London club lawm a kim lo, midfielder Lucas Torreira chu defender James Bolton-a'n a tih tluk vangin zawn chhuah a ngai hial, Uruguay international hi engtia rei nge a chawlh a ngaih dawn tih a la hriat loh.

League One pathumna Portsmouth hian league sang zawka kai an duh avangin FA Cup an dah pawimawh lo zawk, an goal khung thei pahnih Curtis leh John Marquis bakah captain Tom Naylor chu bench lamah an dah - chak lo mah se an tumah an chiang.

Coach Jackett chuan, "Hnehna chang tur chuan goal khung a ngai, a tir lamah khan goal nei ila chuan a humhim dan pawh a awm ang. Mahse, Gunners an khel ṭha a, goal hnih an neih hmasak bawk avangin kan tan chuan thawh leh a harsa," a ti.

English club inelna sang pahnihna Championship kai turin Portsmouth dinhmun a ṭha chho a, league bakah Leasing.com Trophy final khelh tur an la nei. April 5, Inrinni zan hian Wembley Stadium-ah Jackett-a naute hian Salford an hmachhawn dawn.

     Ngaihnawm

    Arsenal hian FA Cup an khelh hnuhnung pasarihah vawi nga chu quarterfinal an lut a, 2016-17 season-a nomawi an chawi hnuah erawh kumin hi a thiam pariat zinga an tel lehna hmasa a ni.

    Fratton Park-ah Portsmouth hi nikum September thla hnuah an tlawm ve leh chauh, Carabao Cup-a Southampton (4-0) an ngam loh hnuin match 19 chhung chu tlawm loin an kaltluang, tunah an record duhawm chu a tawp.

    Sokratis-a'n season kal laiah Arsenal tan goal khung tumin target zawnah vawi thum a pet tawh a, a lut vek.

    Eddie Nketiah hian Arsenal tana inkhel bul a ṭan hnuhnung paliah vawi thum goal a khung, a goal khung zinga pahnih chu FA Cup-ah a ni.

    Arsenal tana inkhel bul a ṭan hnuhnung pariatah Reiss Nelson hi goal pangaah a inrawlh, goal hnih khungin a ṭhiante khung tur vawi thum a siamsak.