Aizawl FC lakah East Bengal champion beiseina a thamral

Kolkata club lian East Bengal hi kum 99 zeta upa ni tawh mah se I League awm hnuah an la champion lo a, tun season-ah pawh an la champion dawn chuang lo niin a lang.

Thawhṭanni zan khan East Bengal hian an mual Salt Lake-ah player 10-a khel Aizawl FC chu 1-1 in an draw hram a, hmahruaitu Chennai City chu point sarih an pha lo. South Indian club hian match khelh hmabak pahnih aṭangin point thum an hlawhchhuah theih chuan an champion ang.

East Bengal tan Aizawl FC nena an inkhel hi tun season-a an home match hnuhnung ber a ni a, Salt Lake-a inkhel entu zat hi 17,204 a ni.

Kolkata club hian champion beiseina an la nei a, amaherawhchu an match hnuhnung bera Churchill Brothers nen an inhnehtawk avang leh an elpui Chennai City-in Mohun Bagan an hneh avangin beiseina an nei sang ngam tawh lo a, entu zat tlak hniam chhanah a ngaih theih.

Kolkata club tan Mizo tlangval pathumin bul an ṭan a, Lalrindika Ralte chuan captain armband hrengin R. Laldanmawia leh Lalramchhullova te inlanin Brandon VL Remdika chu bench-ah a awm. Aizawl FC lamah foreigner pangain bul an ṭan a, paruk dang erawh Mizo an ni.

Aizawl FC-in Kolkata club lakah inkiltawihna an nei lo a, Johnny Acosta hrem vanga lut Salam Ranjan Singh-a tan harsatna an siam hnem nghal hle. 

Minute 23-naah Leonce Dodoz chuan lalutin keeper Rakshit Dagar rawn tleng chhuak chu a ke vei lamin a pet khum zeuh a, Aizawl FC-in goal an khung hmasa zawk. East Bengal tan Danmawia'n chance ṭha nei mah se Mizo keeper Lalawmpuia'n a dan sak.

Goal hmaah Aizawl FC an hlauhawm zawk a, East Bengal keeper Rakshit ball vawm chhuak tur chu Ansumana Kromah-a'n dan sak hmain Mizo club goal hnihna ni turin a khung a, amaherawhchu referee Umesh Bora-a'n foul tiin a pawmsak lo a, replay en let erawhin AFC forward Kromah-a'n dan bawhchhiatna a nei lo.

Second half-ah substitute Samad Ali Mallick-a cross chu Enrique Esqueda chuan minute 65-naah a tauh lut a, East Bengal-in beiseina thar an neih phah.

Minute nga hnuah Aizawl FC defender Kareem Omolaja chu Joby Justin laka a foul avangin hnawhchhuah a ni a, thil thlen dan erawhin sawi zui a hlawh hle.

Referee Umesh-a'n yellow card a phawrh zet a, buaina tenau chhuah hnuah Kareem hi red card a pe leh ta zawk. Aizawl FC defender Kareem-a chet dan hi red card pek theihna ni mah se referee thutlukna siam dan erawh hriamthiam a har thung.

Team pahnih an innam buai lai hian Joby Justin hian Kareem hi chil a chhak khum a, red card bakah hremna na zawk pek theihna tur a ni a, pressure ngah East Bengal player-ten nun dan mawi an lantir thei lo.

Aizawl FC-in player 10-a khel chungin an khel ṭha chhunzawm a, hun tawpah erawh East Bengal-in an nawr bet thung. Substitute Brandon-a freekick hlawhchhuah chu Didika'n a pet goal teuh viau a, Joby Justin-a'n Mizo tlangal Brandon-a ball cross chu goal ban tauh per nan a hmang mah se goal erawh an khung belh thei lo.

East Bengal tan champion tur chuan an match hmabak Real Kashmir, Minerva Punjab leh Gokulam Kerala te khualmuala an hneh vek bakah Chennai City-in Churchill Brothers leh Minerva Punjab-te lak aṭangin point khat chauh an hlawhchhuah a ngai a, thil thleng thei ni mah se a thlen kher erawh rinawm tawh lo.

Aizawl FC erawh East Bengal laka point khat hlu tak an hlawhchhuah avangin pakuanaah an inhlang chho a, table mawngphaha awm Shillong Lajong aia point li laia an san zawk avangin season thara I League khel chhunzawm zel turin an dinhmun a ṭha hle.