March thlaah Neymar a rawn kir ang - Tuchel

Paris Saint-Germain coach Thomas Tuchel chuan a player duhlai Neymar chawlh chen tur chu a hriat theih thawkhat tawh tih a sawi a, Brazil forward hian March thla aṭangin team training a zawm ve leh thei tawh ang.

January 23 khan PSG leh Strasbourg ten French Cup an khel a, he inkhelah hian hliam a tuar. February 20 aṭang khan Brazil-ah inenkawlin hun a hmang mek a, a dam chian hma chuan Ligue 1 champion hian chhawr luih an tum lo.

PSG manager Tuchel chuan, "Manchester United nen kan inkhelh hmain Paris-ah a rawn let dawn a, la inkhel dawn lo mah se boruak a siamṭha zual ang. Tunah chuan kan awmhmun a danglam em avangin inbiak pawh a harsa. Mahse, Brazil-ah ṭha takin hun a hmang tih ka hria, United nena inkhelh zawhah chuan training pawh a nei pumhlum thei tawh ang," a ti.

Barcelona forward hlui hian Champions League last 16 first leg-ah Manchester United a hmachhawn thei lo a, March 6 zanah second leg an khelh hunah pawh a la inlan thei dawn lo - United nen an inkhelh zawh aṭangin training nei tura ngaih a ni. UCL semifinal an lut a nih chuan an chhawr thei tawh ang.

French champion PSG hian an player pawimawh Neymar awm loh hlanin inelna hrang hrangah match riat an khelh tawh zingah vawi sarih hnehna an chang a, vawi khat an chak lo thung. Season hmasa pawh khan Neymar hian hliam vang bawkin thla thum chhung a khel thei tawh lo a ni.