Venus Williams che fuh lo chhunzawm

Grand Slam vawi sarih champion tawh Venus Williams chuan season duhawm lo a hmang chhunzawm, nimin khan Venus hi Mexico Open-ah inlanin match point vawi sarih zet a chhawr ṭangkai theih loh hnuah a tlawm.

Australian Open lama beisei phak lo Venus hi Kaja Juvan lakah chak tura rinkai a ni. Mahse, darkar hnih leh minute 38 an inkhelh hnuah Venus hi 4-6, 7-6 (7-4), 6-2 in a chak lo - set hnihna an khelh laiin match point vawi sarih a hmuh a chhawr lo vek.

American star Venus hian tun hmain Acapulco-ah hian hlawhtlinna a lo chang tawh, tun ṭumah hian a khel fuh lo hle; double faults ringawt pawh vawi 13 ngawt a nei.

Inkhel dangah Sloane Stephens pawh a chak lo, seeded pakhatna leh 2016 champion ni bawk Stephens hi tualchhung nula wildcard hmanga inlan Renata Zarazua lakah 6-4, 6-2 in a tlawm. Season kal laiah Stephens hi match li chu a zawnin a chak lo ta.