Coronavirus-in infiamnaah nghawng a nei lian

China ram aṭanga inṭan hri hlauhawm coronavirus (Covid-19) a darh zau zel a, infiamna khawvelah nghawng lian tak neiin inelna neih tur ṭhahnem tak ṭhulh a ni tawh. Europe club lianten season chawlh laia an khelh ṭhin International Champions Cup pawh kumin bikah chuan Asia rama khelh ni lo turin thultukna an siam.

Season ṭan hma inpuah-chahna friendly match hi North America, Australia, Europe leh Asia-ah te khelh a ni ṭhin a, Europe club ṭha an inhmachhawn ṭhin avangn ngaihhlut a hlawh ṭhin hle. Nikum pawh khan Asia rama inlan zingah Manchester United, Tottenham, Juventus leh Inter Milan te an tel. 

ICC hian fixtures hi a la puang lo a, chutihrualin Copa America leh European Championship awm kum a nih avangin inkhel tur erawh tih tlem tum a ni hrim hrim. United States-ah friendly match hi kaltlangpui tum a ni a, Asia erawh coronavirus vanga zin veivaihnaah harsatna a awm a theih avangin an ṭhulh.

ICC promoter Relevant Sports chuan, "Fans, club, staff leh kan thawhpuite kan tan an hlu a, an himna leh hriselna hi kan ngaih pawimawh hmasak ber a ni. Asia hi kan ngai pawimawh reng a, match awm theih hmasak berah inelna kan buatsaih ang," tiin thuchhuah an siam.

Switzerland sorkar chuan coronavirus mi 1000 aia tam telna chin tawh phawt chu March 15 thleng huaihawt a khap a, hei vang hian Swiss Football League-a club 20 pawh thuneitute nen Thawhṭanni khan inhmu khawmin March 23 thleng chu chawlh lailawk ni se tiin an rel.

Switzerland-ah hian convid-19 vangin mi 500 endik a ni tawh a, mi 100 chuang chu dah hran an ni tawh. Switzerland-ah hian convid-19 vei 24 hmuhchhuah a ni a, Grisons-ah paruk awmin Geneva-ah panga an awm tawh a ni. Football bika a nghawngna lian ber chu Italy-ah a ni thung a, Serie A inkhel panga bakah league hnuai zawka match ṭhahnem tak inkhelh hun sawn a ni tawh. Italy-ah hian entu awm loa inkhelh ṭumte a awm a, Inter Milan chief executive Giuseppe Marotta chuan season an hman zawh theih loh a hlauh thu a sawi chhuak hial.

Archery-ah Dhaka, Bangladesh-a neih tur ISSF International Solidarity Cham-pionships (22-28 February) chu inelna neih hun sawn a ni tawh a. Shanghai-a World Cup (May 4-10) neih tur pawh ṭhulh a ni tawh bawk.

Athletics-ah World Athletics Indoor Championships chu March 13-15 hian Nanjing-a neih tur ni mah se nakkum lama neih turin a hun sawn a ni. North Korea-a Pyongyang Marathon (April 12) neih tur pawh an ṭhulh.

Badminton-ah China Masters tournament (February 25 -March 1) chu player ṭhahnem tak an inhnuhdawh avangin inkhelh hun an sawn a, China Masters tournament pawh 24-29 a neih tur chu June 2-7 ah an sawn. 

March 3-8 inkara khelh tur 2020 German Open pawh Olympic qualifier a ni tel nachungin an ṭhulh a, 2020 Polish Open pawh March 26-29 chhunga khelh tur chu a hun sawn a ni tawh bawk.

Boxing-ah Asia leh Oceania ten Wuhan-ah Oympic qualifier khelh tur a ni a, amaherawhchu covid-19 vangin inelna hi Amman (March 3-11) ah an sawn. Infiamna dang baseball, baksetball, motor racing, rugby, cycling, hockey leh e-sports thlengin nghawng a nei chho zel.

2020 Summer Olympics hi July 24-August 9 chhung hian Tokyo, Japan-ah neih a ni dawn. Organiser chuan ṭhulh tumna a la awm rih loh thu thuchhuah an siam a, chutihrualin convid-19 hian zual lam a pan a nih chuan tuna thuthang 'Olympic ṭhulh a ni dawn' tih hi a taka thleng thei a ni.

European Football Cham-pionship (Euro 2020) khelh nan ni 100 a awm tling tawh lo a, kumin inelna hi ram 12-ah nghah a nih dawn avangin covid-19 vanga buai theihna dan a tam hle. UEFA erawh an hlauthawng lo, UEFA Executive Committee member Alexey Sorokin chuan, "Coronavirus hi kan thupui ber a ni lo. Tun dinhmunah chuan convid-19 lakah Europe khawmualpui hi kan la inveng 

ṭha viau a, entu ṭhahnem tak kan neih theih nan hma kan la chho zel," tiin a sawi.