Tlai dar 2:00-ah Chhinga Veng Vs ATK
Hero 2nd Division League-ah Chhinga Vengin vawiin tlai dar 2:00 hian ATK Reserves an mikhual dawn. Group khat aṭangin team pahnihin final round an lut dawn a, group C inkhel dangah Trau FC-in Khuman Lampak Stadium-ah Mohammedan Sporting Club an hmachhawn ve bawk ang.
Mizo club hi match li an khelh tawh aṭangin point 10 an hmu a, an group-ah hmahruaitu an ni mek. Chhinga Veng hian match hmasa berah New Barrackpore Rainbow nen an inhnehtawk tih loh chu an khingpui Jamshedpur FC Reserves, Mohammedan leh Trau FC te an hneh vek.
Chhingcows hian RG Stadium-ah 2nd Division League hi match khat chauh an la khel a, Mohammedan an hmachhawn ṭumin an khelh danin mipui mit a tlung hle. Lalsangzuala Hmar hote hian ground ball an khel a, an mualah Kolkata club ṭha an kat kual a; MS Dawngliana, Lalromawia leh Lamuanzova te goal hmangin hnehna an chang.
Chhinga Veng hian February 23 khan Manipur club Trau chu an mualah an lenchilh a, 2-0 in hnehna an chang. Hetah hian Ṭhasiama leh Lalliansanga ten goal an khung a, goal khungtu pahnih hian Chhingcows an zawm hnuah an theihna angin an la khel lo a, goal an khung tak avangin inringtawkna an ngah sawt ang.
Mizo club hian Ukranian striker Ronaque Bakshi chu an chhuahtir a, tun dinhmunah chuan foreigner pakhat Ghanaian defender Godwin Quashiga chiah an kawl. Coach Sanga chuan, "Bakshi hian kan khelh dan hmang a hrethiam chiah lo a, kan chhuahtir mai hi a ṭul a ni. Godwin erawh defender ni mah se keini chuan defensive midfield atan kan hmang a, a ṭangkai hle," tiin Vanglaini a hrilh.
Mohammedan nen hneh ṭumin Bakshi hian minute 60 chauh a khel a, khualmuala Trau FC an hneh ṭumin team-ah a awm tawh lo. Chhingcows hian Ukranian striker awm loin result ṭha an hlawh chhuak thei a, amaherawhchu ATK Reserves lakah an fimkhur a ṭul ang.
ATK Reserves hian final round an lut ve thei lo a, amaherawhchu Mohammedan SC an hneh thei a, New Barrackpore Rainbow AC nen an inhnehtawk bawk avangin zuam chi an ni lo. Vawiin match hi Mizo match commissioner Lalrawngbawla hnuaiah khelh a ni dawn a, inkhel en man hi Rs 50 a ni ang.