Vawiinah Dr T. Ao U21 Football Final Mizoramin Arunachal Pradesh hnehin final an lut

2nd Dr T. Ao North East International NEC Gold Cup Under 21 Football Championship-ah Mizoram chuan nimin khan Arunchal Pradesh 5-0 a sawpin final an lut. Vawiin tlai dar 5:30 hian SAI Ground, Guwahati-ah final khelh a ni dawn a, Mizoram leh Meghalaya an inhmachhawn ang.

Nimin inkhelah hian Mizoram tan PC Lalhriatpuia'n goal hnih a khung bakah F. Lalnuntluanga, Flavius Lalruatkima leh Lalremruata ten goal khat ṭheuh an khung. Coach Vanlalpeka Ralte hote hian tun inelna match ruk an hmachhawnah match liah goal an chhuah lo.

Mizoram hian semifinal-ah hian damlohna vangin left back Vanlalnghenga an chhawr thei lo a, winger pahnih K. Roluahpuia leh Hmingchhuanga Hauhnar pawh inhliam vangin hman ngam an ni lo.

Goalkeeper-ah Lalrinnunga awmin, tlarhnungah Lalmawizuala, Lalmuanawma, Flavius leh David Lalrinsanga te an inltar a. Midfeld-ah David Lalthansanga, K.C. Larchhuakmawia leh Lalruatfela te awmin tlarhmaah Remruata, Hriatpuia leh Tluanga te dah an ni.

Mizoramin Tluanga hmangin minute 17-na lekah goal an khung a, team ṭha zawk an nih avangin harsatna an nei zui lo. First half tawp hma hretin Hriatpuia'n a khung belh a, halftime-ah 2-0 a ni.

Second half-ah Mizoramin a khat mawi tawkin goal an khung a, defender Flavius chuan minute 50-naah goal mawi a khung a, Hriaptuia'n minute 73-naah goal hnihna khung belh lehin Remruata'n minute 84-naah goal ngana a khung.

Mizoram manager Peter Lalzawmliana chuan, "Kan naute an khel ṭha em em a, chak phu zawk kan ni a, kan khelh danah kan lungawi hle. Guwahati-a Mizo missionary awm ten min ṭawiawm ṭha em em a, ṭantu nei ṭha ber kan nih avangin kan thla a muan phah hle. Arunachal nena kan inkhel hi tun inelnaa kan khelh ṭhat ber ṭum a ni," tiin Vanglaini a hrilh.

Meghalaya hian final lut turin Sikkim 1-0 in an hneh a, anni hi Mizoram nen group khatah an awm a, 3-3 in an inhnehtawk.

An intawn hmasak ṭum hian Mizoram tan Lalremruata, F. Lalnuntluanga leh David Laltlansanga ten goal an khung a, amaherawhchu Meghalaya hian ṭum hnih goal an khung hmasak avangin an intluk tawk tih a chiang hle.

Mizoram hian Santosh Trophy qualifying round-ah Meghalaya hi Lammualah an hneh loh avangin kuminah final round an khel dawn lo. Tun ṭuma inelna erawh kum bithliah inelna ni mah se Mizoram Under 21 team hian hnehna an chang a nih chuan Mizo football ngainatute thinlung hliam tan nachhawkna ṭha tak a ni ang.

Final chungchang  thlirin manager Peter-a chuan, "Final-ah hian Hmingtea leh K. Mama te kan chhawr thei dawn chuang lo a, Nghenga erawh kan hman theih tawh kan beisei. Meghalaya hi team ṭha tak an ni a, an che rang a, nomawi chawi tur chu thawhrim a la ṭul ang," tiin chak loh theih a nih thu a sawi.

Mizoram team hi manager Peter-a, coach Vanlalpeka Ralte, asst coach Timothy Vanlalchhuanga Ngente leh asst manager NC Hmingthanzuala ten an enkawl a ni.