Leicester City enkawl tur Brendan Rodgers

Celtic manager Brendan Rodgers chuan Scotland chhuahsanin Premier League-ah a kir a, Leicester City coach ni turin June 2022 thleng atan contract a ziak. 

Northern Irish manager hian kum khatah pound maktaduai 5.5 a hlawh dawn a, Thawhlehni zan khan Leicester City-in 2-1 a Brighton & Hove Albion an hneh lai chu a hmunah a en nghal - he inkhelah hian Demarai Gray leh Jamie Vardy te chuan Foxes tan goal an khung. 

Rodgers chuan, "Fan-ten chhuang taka Leicester chanchin an sawi theihna turin he club tan hian ka nun ka hlan dawn a ni," a ti a, "Kan thawhho phawt chuan kan chak lehzual ang tih ka tiam a, players, staff leh fan-te nena thawhho hlan ka nghakhlel tawh takzet a ni," a ti bawk. 

Leicester City hian Pathianni khan Crystal Palace laka 1-4 a an tlawm hnuin coach Claude Puel chu a hna aṭangin an chawlhtir a, rei pawh a rial hmain Rodgers hi an coach thar turin an lalut nghal. 

Swansea City-a a hlawhtlinna avanga hriat hlawh manager hian 2013-14 season khan Liverpool chu Premier League-ah pahnihna a nihpui a, mahse October 2015 khan ban a ni. 

Kum 2016 khan Scotland lamah kalin Celtic a enkawl zui a, tualchhung inelnaa nomawi chawi theih awm, a hmaa inchhawp pasarih chu a chawi vek a, a chhuahsan lai pawh hian Scottish Premiership-ah pakhatna an ni mek. 

League Managers Association-in kum 2014-a Liverpool-a a hnathawh avanga Manager of the Year-a an thlan Rodgers hian Scotland-ah kum hnih leh a chanve hun a hman chhungin Celtic hi Champions League group stage a khelhpui ve ve bawk. 

Match 69 chhung chu a zawna tlawm miah loin Celtic hi a kaihruai a, kum 100 zet lo ding tawh British record chu a thaichhia. Rodgers thlak tur hian Celtic chuan an manager hlui Neil Lennon chu season tawp thleng atan an lalut ve lehnghal. 

Leicester vice-chairman Aiyawatt Srivaddhanaprabh chuan, "Brendan te ang manager ṭha kan lalut thei hi ka lawm hle a ni," a ti a, Foxes-in thla 23 chhunga manager nghet an neih palina a ni!

Rodgers hi Celtic lama a coaching staff zinga mi Kolo Toure chuan a zui ve bawk a, Ivorian defender hi Arsenal, Liverpool, Manchester City leh Celtic tana lo khel tawh a nih avangin Rodgers tan a tawnhriat hi a ṭangkai ang.