Club Brugge aia rinkai Man United

Manchester United-in Jan Breydel Stadium, Bruges-ah Club Brugge an chelh a, 1-1 in an inhnehtawk. Zanin dar 1:30 hian Old Trafford-ah club pahnih hian Europa League last 32 second leg an khel dawn a, Ole Gunnar Solskjaer hote rinkai zawk an ni ang.

Jan Breydel Stadium-ah Emmanuel Dennis hmangin Club Brugge-in minute 15-naah goal an khung a, United-in Anthony Martial hmangin minute 36-naah an sut. Belgian club an khel ṭha a, United an tlawm loh avangin lawm tur a ni.

United-in hnehna an chan loh chhanah chhuanlam an nei thung. Solskjaer chuan, "Ruahsur vang te, thli thawt vang tein inkhelh a harsa hle. Team pahnih tan a harsa tih chu kan hria a, amaherawhchu team ṭha zawkin kan tuar. Ground kha astro turf ang mai a ni a, ball a sawt chak a, player tan a awlsam lo," tiin a player-te a chhan.

English club ṭantute pawh Belgium club-in an thlen danah an lungawi lo a, Bruges mayor hnenah an lungawi loh thu an thlen hial. United ṭantute hian Police-te chu ground bul hnaia awm lo tura taxi driver-te hrilh leh English club ṭantute phur lo tura tiah an puh a, stadium kalkawng dik lo hrilh an awm bakah stadium-a away team ṭantute chhuahna chu an  kalh niin an sawi bawk.

Manchester United hian Club Brugge an hneh hnuah Watford an hneh a, Bruno Fernandes chu danglamna thlentu a ni. Portuguese midfielder hian tun season Europa League-ah Sporting CP tan goal nga a khung tawh a, United tan Europa League bikah goal la khung lo mah se Club Brugge nen an inkhelh ṭumin bench aṭanga a luh hnuah inkhel a danglam hle.

Watford an hneh ṭumin Bruno Fernandes-a'n penalty aṭangin a khung a, Belgian club laka goal khungtu Anthony Martial leh Mason Greenwood ten an khung bawk. Rawlthar duhawm Greenwood hian Europa League-ah goal li a khung tawh a, hmabak a nei êng chho hle.

United lawmna belhchhah turin midfielder thawkrim Scott McTominay a dam tawh a, Brugge lamin an player pawimawh first leg-a goal khungtu Emmanuel Dennis leh captain Ruud Vormer te hliam vangin an chhawr 

thei dawn lo.

Brugge hian Pathianni khan Charleroi 1-0 in an hneh a, hemi ṭum hian Nigerian forward Emmanuel Dennis hi a inhliam. Philippe Clement tana thu lawmawm erawh first leg-a chhawr loh Senegalese forward Krepin Diatta a dam tawh thung.

Belgian tan Europa League last 16 thleng turin goal khung ngei a ngai a, goal awm loa an inhnehtawk a nih chuan away goal rule hmangin an tla dawn.