Fury-a'n Wilder hmachhawn dawn rih lo

World Boxing Council president Mauricio Sulaiman chuan Tyson Fury chuan Deontay Wilder a hmachhawn leh hmain boxer dang a hmachhawn phawt tur thu a sawi. 

December khan Fury leh Wilder hi an lo inhmachhawn tawh a, sawisel theih tak hmangin inhnehtawkah puan an ni a, rematch a awm leh ngei beisei a ni. 

WBC president Mauricio Sulaiman chuan, "Wilder hian rematch neih leh ngei a duh thu a tichiang tawh a, hetihlai hian Fury chuan boxer dang hmachhawn phawt a, a hnua Wilder hmachhawn hi a duh a ni," a ti. 

Kar hmasa lawk khan Fury hian USA lama a fight neihte pe chhuak turin ESPN chu inremna a ziahpui a, fight a neih leh tur panga pe chhuak turin pound maktaduai 80-in a inrempui. 

Mahse, he inremna hian Showtime network nena thawkdun Wilder nena an inhnek leh tur chungchangah buaina a thlen rin a ni a, heavyweight boxer langsar dang  Anthony Joshua chu DAZN streaming nen an thawkdun bawk.

WBA, IBF leh WBO  champion ni mek Joshua hian June 1-ah inhnek a hmachhawn dawn a, Madison Square Garden-ah American boxer Jarrell Miller a hmachhawn ang.