Match thum hnuah Everton an chak

Premier League match thum chhung a zawna an tlawm hnuah Everton chuan chak ni hmel an hmu ve leh ta. Midfielder Gylfi Sigurdsson-a goal hnih hmangin Cardiff City 3-0 in an hneh.

Thawhlehni zan league match inkhelah Everton bakah hian Huddersfield Town, Lei­cester City leh Newcastle United te pawhin hnehna an chang a, nizan khan inkhel dang paruk a awm zui bawk.

Inkhel hun ṭhenkhat tih danglam vangin February 9 hnuah Everton hian match an nei ve leh chiah, inelna hrang hrangah an match hnuhnung paruk zinga pangaah an tlawm avangin hun rei zawk inbuatsaihna hun an nei hi an tan thil lawmawm a ni.

Cardiff City Stadium-ah goal khung turin an dawhtheih a ngai, chawlhlawk hma deuhin Sigurdsson chuan Seamus Coleman-a ball pek let nalh tak chu a khung a, Icelandic playmaker bawk hian substitute Bernard thawhrah sengin minute 66-naah an goal hnihna a khung bawk.

Hun tawp hma chiahin forward Dominic Calvert-Lewin chuan an chak nem­nghehna a khung a, Pathianni zanah Everton hian Goodison Park-ah Liverpool an hma­chhawn zui ang. Toffees leh Reds hi English club inhal ber zinga mi a ni a, Merseyside derby hian ngaihven a hlawh dawn.

Everton manager Marco Silva chuan, "Ni 17 chhung hahchawlhna hun kan nei a, kan duh leh tum angin kan inkhel thei a. Thil pawimawh ber mai chu hnehna kan chan bakah inrintawkna kan nei let leh ta kha a ni. Pathianni zanah fiahna kan hmachhawn dawn, Liverpool nen season tir lama kan intawnah kan chak loh avangin tun ṭumah chuan hneh­na kan chan a ngai," tiin a sawi.

Toffees manager Silva-a'n tlarhnungah Michael Keane leh Phil Jagielka te an nei let leh tawh a, an tlarhnung phui lo lutuk pawh a ziaawm chho leh tura ngaih a ni. Mid­fielder Sigurdsson leh Morgan Schneiderlin te bakah Richarlison te inkawp hi team dang tana buaina thlen tham an ni bawk.

Neil Warnock-a enkawl Cardiff erawhin hmalam an pan thei rih lo, match 28 aṭangin point 25 chauh an la neih avangin 17-naah an awm. A hnuaiah hian Southamton (24 points), Fulham (17) leh Huddersfield (14) te chauh an awm avangin an dinhmun hi a la him lo hle.

Manager Claude Puel an ban hnua an match hmasa berah Leicester City chuan Brighton & Hove Albion chu 2-1 in an hneh a, an manager lailawk Mike Stowell-a'n a enkawl a, an match lehpek aṭang chuan manager thar Brendan Rodgers-a'n a enkawl tawh ang.

Foxes tan hian Demarai Gray-a'n minute rukna lekah goal hmahruai khungin, second half-ah Jamie Vardy-a'n an goal hnihna a khung. English striker Vardy goal khung hnu lawkah Davy Propper-a'n Brighton beiseina siam turin goal khat nei ve mah se awmzia a nei phak tawh lo.

Brighton hian kum 2019 bika an league match-ah chak an la nei lo a, anni ang tho hian Leicester pawh hi tun hnaia khel ṭha lo tak an ni. Manager chhuak ta Puel-a khan a match hnuhnung pasarihah chak a nei lo a ni.

Newcastle United tan tlak hniam hlauhthawn awmna a bo mek zel. Rafael Benitez-a naute hian Fabian Schar leh Sean Longstaff te goal hmangin Burnley 2-0 in an hneh a, point hmu lo Clarets hi 15-naah tlahniamin an dinhmun a him ta lo hle.

Spanish manager Benitez chuan, "Longstaff kha club academy chhuak a ni a, a goal hmasa ber a khung kha ka lawmpui. Hetiang hun tawng tur hian a thawkrim a, hun hlimawm dang a tawn chhuanzawm ngei pawh ka duhsak," tiin a sawi.

Thawhlehni zan Premier League inkhel dangah Hud­dersfield chuan hun tawp hma chiaha Steve Mounie goal khat hmangin Wolves 1-0 in an hneh a, a zawna match 14 chhung chakni hmel an hmuh loh hnuah point thum hlu tak an sual chhuak.

German manager Jan Siewert-a'n Terriers a enkawl hnua hnehna a chanpuina hmasa ber a ni a, table mawngphah luahtu ni rih mah se inhamtang turin beiseina an la nei a. Siewert hian a match hmasa lamah Everton, Chelsea, Arsenal leh Newcastle te a ngam lo a ni.