Goa khelmualah Chennaiyin FC
Semifinal khel tura an dinhmun chiang tawh FC Goa chu zanin dar 7:30 hian Indian Super League-ah an inlan dawn a, champion lai Chennaiyin FC an mikhual dawn.
FC Goa hian semifinal lut chiang tawh mah se pahnihna dinhmun erawh a la chiang lo - zaninah hnehna an chang a nih chuan table chung bera awm chiang sa Bengaluru FC an pumpelh dawn tihna a ni a, South Indian club hi a pumpelh theih dan a awm a nih chuan pumpelh an duh ang tih a chiang.
Hetihlai hian match 17 an khelh tawha vawi hnih chiah la chak Chennaiyin FC hian mualpho taka season khar an duh dawn bik lo a, an match tawp berah hnehna chan hram an duh ang.
Chennaiyin hian table-ah 10-na dinhmun an luah mek a, hnehna chang pawh ni se table mawngphah hi an chhuahsan theih tawh chuang lo - an chung chiaha awm Kerala Blasters chu khelh zat inangah point ngain an phak lo.
Indian Super League-a relegation awm lo hlauh chu Chennaiyin FC tan vanneihna a ni a, season hmasa champion nichunga relegate an pumpelh phah!
Chennaiyin-ah hian Jeje Lalpekhlua, Zohmingliana Ralte, Jerry Lalrinzuala, Isaac Vanmalsawma leh Laldinliana Renthlei te an khel mek.