Kum hnih chhung atan Jayasuriya an hrem

Sri Lanka captain hlui Sanath Jayasuriya chu cricket khawvela thuneitu sang ber International Cricket Council hnuaia anti-corruption code dan a bawhchhiat avangin kum hnih chhung cricket lam thila inhnamhnawih thei lo tura hrem a ni. 

October-a thubuai siamsak tawh kum 49 mi hian chhui chian a nihnaah amah chhuitu te chu a thawhpui ṭha tawk lo tih a pawm a, a inpawmna ang hian kum hnih chhung atan hrem a ni. Kum 2012-ah Jayasuriya hian cricket a chawlhsan tawh a, Sri Lanka cricket-ah selectors chairman dinhmun a lo luah tawh bawk. 

ICC general manager Alex Marshall chuan, "He hremna hian chhuichianna neih a nih laia hnathawktute thawhpui pawi­mawhzia a tarlang a ni. Eiruk leh hlemhletna aṭanga infiamna hi lak hran a nih theih nan hnathawktute thawhpui theih chuan an thawhpui zel hi a pawimawh em em a ni," a ti. 

Jayasuriya hi thubuai siam­saka chhuichiangtu te pui tura tih a nihna ber hi Sri Lankan cricket-a eirukna thleng chungchangah a ni a, kum 1996 World Cup-a Sri Lanka an champion ṭuma player of the tournament chuan, "Cricket-in hma a sawn zel theih nan leh a ṭhat zawk nan thubuai siamsak ka nihna kha ka pawm a ni," tiin a sawi.