Milan leh Lazio inhnehtawk
Thawhlehni zan Coppa Italia semifinal inkhelah AC Milan leh Lazio te chu goal lut loin an inhnehtawk a, April 14 hian San Siro-ah second leg khelh a ni dawn - chak zawk an awm a ṭul tawh ang.
Stadio Olimpico-a inkhelah 2013 champion Milan lamin hun ṭha nei nuam mah se an tum ber goal an khung thei bik lo. Gonzalo Higuain thlak nana an lak thar striker Krzysztof Piatek pawh tun hnaiah khel ṭha hle mah se Lazio laka chakna goal khung turin a vannei zo bik lo.
Lazio coach Simone Inzaghi chuan, "Milan khan min nawr ngei mai, mahse keini lam khan goal khung tumin goal lamah kan pet hnem zawk. A chang chuan ball chang tlem zawk ni chunga beih a ngaih chang hi a awm ve a ni," tiin Milan aiin ball an chang tlem zawk tih a pha lo.
Milan manager Gennaro Gattuso chuan, "Goal kan khung lo a ni mai a, a bak zawng kha chu kan ti ṭha thawkhat hle a ni. Tunah chuan Cup inelna kan dahṭha rih anga, kar tawpa Sassuolo nen kan inkhelh turah ngaihtuahna kan seng rih ang," tiin a sawi.