Cilic hnehtu Gael Monfils

Gael Monfils chuan Marin Cilic laka a record neih ṭha tak a chhawm nung zel a, nimin zing khan US Open champion hlui Cilic hnehin Dubai Tennis Championship-ah second round a inhlangkai. Player langsar dang Daniil Medvedev erawh beisei loh takin a chak lo nghal.

Khup hliam dam hlim Cilic-a'n a khingpui Monfils tan harsatna lian tham a siamsak thei lo a, seeded pathumna hian 6-3, 4-6, 6-0 in hnehna a chang - player pahnih hi vawi li an intawn tawhah Monfils-a'n hnehna a chang vek.

Kar hmasa mai khan Monfils hian Grand Slam vawi thum champion tawh Stan Wawrinka hnehin tennis a khelh hun chhunga ATP title pakuana a chawi a, inrintawkna a neih san vanglai a ni a. Croatian player ṭha Cilic lakah hian a service bikah point a hloh miah lo a ni.

Tun inelnaah Monfils hi seeded a ni phak lo. Mahse, tun hnaia a khelh ṭhat chhoh dan chhutin player langsar dang pawh hneh thei turin theihna a nei, a match lehpekah chuan Marcos Baghdatis nen an inhmachhawn ang.

Inkhel dangah seeded pariatna Medvedev chu world number 113 Ricardas Berankis lakah 6-3, 6-3 in a tlawm. Seeded pakhatna Kei Nishikori chuan Benoit Paire 6-4, 6-3 in a hneh a, Stefanos Tsitsipas pawhin 6-4, 3-6, 6-3 in Matthew Ebden a hneh bawk.