Vawiinah club pali hawi lam a hriat dawn Aizawl FC, Gokulam, East Bengal leh Kashmir

Vawiinah I League inkhel pawimawh pahnih a awm dawn. Tlai dar 2:00-ah champion beisei Real Kashmir leh East Bengal te an inkhel dawn a, tlai dar 3:30-ah tla thei dinhmuna ding Aizawl FC leh Gokulam Kerala te an inhmachhawn ang.

I League club thar Real Kashmir-in season khatnaah champion thei tur khawpin an khel ṭha a, match hnuhnung pathumah vawi hnih an inhnehtawk chungin champion thei zinga mi an ni. Amaherawhchu Pulwama, Jammu and Kashmir-a firfiak chetna avangin Srinagar-a an khelmual hman thiam TRC Polo Synthetic Turf Ground an hmang thei lo.

I League champion lai Minerva Punjab chu February 18-ah Real Kashmir nen inkhel tur ni mah se firfiak chetna avangin Srinagar-ah an zin ngam lo a, East Bengal pawhin khelhna hmun sawn an dil bawk. AIFF League Committee Meeting chuan Thawhṭanni khan hemi chungchang hi an ngaihtuah a, neutral venue-a khel turin thutlukna an siam.

Real Kashmir hian East Bengal nena an inkhel tur pawimawh tak hi JN Stadium, Delhi-ah an khel dawn a, tun season-a fan nei ṭha ber zinga mi I League club thar hian an khelmuala an hamṭhatna neih te an hmang thei dawn lo. East Bengal tan erawh vur tlakna hmuna an inkhel lo tur hi chanchin lawmawm a ni thung ang.

Chennai City-in champion turin point thum chiah an mamawh tawh a, East Bengal leh Real Kashmir an inhnehtawk a nih phei chuan South Indian club tan champion turin point khat hmuh a tawk ang.

East Bengal-in an match hnuhnung berah Aizawl FC an draw hram a, hei vang hian Chennai City result-ah an innghat tawh. Chutihrualin Kolkata club ṭantute hian Real Kashmir an hneh loh vanga nomawi an chan chuan an hre thiam dawn lo.

Salt Lake Stadium-a an inkhelh ṭumin team pahnih hi 1-1 in an inhnehtawk a, tun ṭumah erawh a chak zawk tan chauh champion a beisei theih tawh avangin point thum hmu zawk an awm a rinawm. Kolkata club tan Mizo pali Lalrindika Ralte, Lalramchullova, R. Laldanmawia leh Brandon VL Remdika te player pawimawh an ni.

I League aṭangin pakhat an relegate ṭhin a, tun season-ah hian foreigner nei lo Shillong Lajong chu tla tura ngaih an ni. Amaherawhchu hmarchhak aṭanga I League club hmasa ber Lajong hian match hnuhnung pahniha an chak chuan vawiin tlaia inkhel tur Gokulam Kerala emaw Aizawl FC chungah an la awm thei thung.

Hei vang hian Gokulam leh AFC inkhela chak lo zawk hi tla thei dinhmunah an ding dawn. Mizo club hian Kerala club hi an hmachhawn hnuhnung pathumah an la hneh vek a, tun ṭumah erawh chak tura rinkai zawk an awm lo. Aizawl FC hian Thawhṭanni khan East Bengal an hmachhawn a, Gokulam Kerala inkhelh hnuhnun ber erawh kar liam ta Zirtawpni a nih daih tawh avangin mualneitu hian hahdamna hun an nei ṭha zawk.

Aizawl FC coach Standly Rosario chuan, "Aizawl FC hian ni riat chhungin match pawimawh pathum kan khel dawn. Kan khelhna tur hmun hi Kolkata, Kozhikode leh Aizawl a nih avangin a hautak dawn a, player pawh kan siksawi thiam a ṭul ang. India ram hi chu England te nena khaikhin theih a ni lo a, Premier League-ah chuan harsatna a awm miah lo ang, amaherawhchu kan ramah hi chuan a harsa a ni," tiin Vanglaini a hrilh.

India rama knockout inelna Indian Super Cup chu 15 March - 13 April, 2019 chhungin Bhubaneswar-ah khelh a ni dawn a, I League leh Indian Super League-a a sang paruk ve ve an tling nghal dawn.

Inelnaah hian team 16 an tel dawn a, hmunruak dang pali hi qualifying round hmanga zawn tur a ni. Aizawl FC tan qualifying round sang zawka khel turin pariatna tal nih phak a ngai dawn a, Mizo club tan pariatnaa awm mek Minerva Punjab chunga awm hi la beisei ngam a ni.

Super Cup-ah hian I League 2nd Division club-te pawhin qualifying round an khelh ve dawn avangin India ram inelna sangah MPL final rematch hmuh theih dan pawh a awm ang. Tun dinhmunah Chhingcows hi an group-ah hmahruaitu an ni mek.