Zverev tan Nadal a thiam lua

Rafael Nadal-a'n a vawi thum nan Mexican Open nomawi chawi a tum a, nimin zing khan a match hmasa ber khelin Mischa Zverev chu darkar khat leh minute 20 chhung lekin 6-3, 6-3 in a hneh.

Season 14 liamta khan Nadal-a'n Acapulco-ah hian a vawi khat nan nomawi a chawi tawh a, 2017 khan a ṭum hnih nan a hlawhtling leh - kuminah hian champion thei tura rinkai a ni leh mek bawk.

World number 2 Nadal hian second round-ah Nick Kyrgios a hmachhawn leh dawn, Australian tlangval Kyrgios hian inkhel dangah Italian player Andreas Seppi chu 6-3, 7-5 in a lo hneh a ni. 

 

Zverev unau zinga a upa zawk Mischa chak lo mah se, a naupang zawk Alexander Zverev erawhin a service bikah point khat chauh hloh chungin Alexei Popyrin chu 6-3, 6-3 in a hneh. Seeded pathumna John Isner pawhin aces vawi 18 siam chungin Adrian Mannarino chu 6-3, 4-6, 6-3 in a hneh.

Service nei ṭha tak Isner hian a match lehpekah chuan amah ang thoa American player Sam Querrey a hmachhawn dawn. Querrey hian Guillermo Garcia-Lopez 6-3, 6-2 in a hneh a ni.

Seeded palina Diego Schwartzman-a'n darkar hnih chuang hret hun hmangin Marius Copil chu 6-3, 4-6, 6-1 in a hneh. Schwartzman hi kar hmasa khan Rio Open-ah inlanin a ke na vangin a inkhel thei lo a, kar khat hnuah a inkhel leh chiah.