India barakhaihtu Ritu Phogat Wrestling khawvel aṭangin MMA a pan!

Wrestling Federation of India chu an thu hriat châk loh ber pawl hrilh hriat an ni a, chu chu Ritu Phogat-in MMA a pan thu a ni. 

Kum 24 mi wrestler hi 2020 Tokyo Olympics atana India-in beisei an neih sanna a ni a, WFI assistant secretary Vinod Tomar chuan, "Ritu-ah hian sum kan seng nasa em em a, kan tan chuan channa nasa tak a ni," a ti. 

World Under 23 Senior Wrestling Championship, kum 2017-a silver medal hlawh chhuaktu wrestler chuan, "Zinkawng hlimawm tak zawh turin ka inbuatsaih mek a ni," tiin a sawi ve thung. 

Ritu-i hian Singapore-a innghat Evolve Fight Team  a zawm a, MMA inelna lar tak ONE Championship-ah a inlan dawn a ni. 

Bollywood movie en ṭhin chuan kum 2017-a tih chhuah Amir Khan-a channa Dangal kha an hre ngeiin a rinawm a, Amir Khan-a'n a lem a chan Mahavir Phogat kha Ritu-i pa a ni. 

Dangal hi Mahavir-a'n a fanute pahnih Geeta Phogat leh Babita Kumari-te India tana wrestler ropui ni tura a chher dan chanchin ngaihnawm a ni a, he film hian khawvel pumah dollar maktaduai 340 a lalut hial.

Mahse, Dangal-ah hian Ritu Phogat-i chanchin a lang ve hman lo. Ritu-i chuan, "Kan chhungkua chu wrestler vek kan ni a, Geeta leh Babita-i te unaunu ka nih avangin beiseina pawh a sang hle. 

"Mipui min beiseina zawng zawng hi tih hlawhtlin ka duh a, mahse inchaina tualzawlah ni loin 'cage' chhungah zawk ka theihna hi pholan ka duh a ni," tiin a sawi. 

Ritu sawi angin an chhungkua hi wrestling lama inhmang an ni a, Dangal avangin Geeta leh Babita phei chuan hriat an hlawh lehzual hle - hmeichhe wrestling-ah India tana sulsutu tih ngam an ni. 

Pa ber Mahavir Singh hian kum 2016 khan coach-te chawimawina sang Dronacharya Award chu sorkar laipui aṭangin a lo dawng hial tawh a, a fate a hrual dan hi chanchin ngaihnawm a tling. 

Phogat unau zinga upa ber Geeta Phogat hian 2010 khan Commonwealth Games-ah gold medal a hlawh chhuak a, Indian hmeichhe wrestler zinga Commonwealth Games-a gold hlawh chhuak hmasa ber a ni a, Olympics-a Indian wrestler inlan thei hmasa ber a ni bawk.  

Geeta-i nau chiah Babita Kumari pawh Commonwealth Games-a India tana gold pahnih la tawh a ni a, an bula awma seilian an cousin Vinesh Phogat pawh Commonwealth Games-a gold la tawh tho a ni a, an unau zinga naupang ber Sangita Phogat pawh wrestler tho a ni!

Ritu chuan, "Hun rei tak chhung chu MMA hi ka lo ngaihven tawh ṭhin a, ka ngainat zawng tak infiamna a nih avangin Indian fighter an awm mang lo hi mak ka ti ṭhin. 

"Indian fighter zinga MMA world champion hmasa ber nih ka duh avangin he kawng zawh hi ka thlang a ni," a ti a, a tumah a chiang hle. 

Haryana-a Balali thingtlang khuaah pawh wrestling chhungkua an ni chungin Ritu chhungte chuan an fanu duhthlanna hi an zah sak thu an sawi a, an phur hle.

Mahavir Phogat chuan, "Thutlukna hi awlsam taka siam a ni hran lo a, a naupan lai aṭang tawhin ani hi chu MMA hian a lung a len tlat a ni," a ti a, a fanu thutlukna a ṭawmpui. 

Wrestling Federation of India-in an fanu chhuanvawr an chan a, 2020 Tokyo Olympics-ah India tan gold la thei tura an beisei a nih avangin an lunghnur hle. 

WFI assistant secretary Vinod Tomar chuan, "Indian wrestler zinga hmabak nei êng ber pawl a ni a, hetiang thutlukna a siam hi ka hrethiam thei lo a ni. India tan a inlan theih tawh dawn loh avangin a thutlukna hi a ngaihtuah chiang turah ka ngai," a ti. 

Ritu hi tun thla tir khan Lucknow khawpuia senior women's national wrestling camp aṭangin a inhnukdawk a, hei hi a hliam vang niin a sawi. 

Vinod Tomar chuan, "Kar hmasa lawk khan kan inbia a, hliam a neih thu min hrilhin a unaunu Sangita chu a aia ram aiawh tura a duhthu a sawi a ni," a ti. 

Kum 24 mi Ritu hian 48 kg huangah inelna a hmachhawn ṭhin a, October 2016 khan a zawna a vawi hnih nan National Wrestling Championships-ah gold a hlawh chhuak. 

Kum 2016-ah vek hian Commonwealth Wrestling Championship-ah inlanin gold a hlawh chhuak a, May 2017-ah India tan Asian Championships-ah a inlan zui a, bronze medal a hlawh chhuak.

November 2017-ah record siamin World U23 Wrestling Championships, Poland-a neihah silver medal a hlawh chhuak a, he inelna ngaihhlut taka India-in silver a hlawhchhuah hmasa ber a ni nghal. 

December 2016 khan Pro Wrestling League-ah a inlan a, auction-ah hmeichhe wrestler manto ber ni turin Jaipur Ninjas chu nuai 36-in a zawm. Mahse, tunah erawh wrestler ni loin 'MMA fighter' tia hriat a ni 

tawh ang.