Athletics-ah ranking siam dawn

International Asso-ciation of Athletics Federations chuan tun hma lama an la tih ngai loh world ranking an siam thar dawn a, tun season-a World Championship an neih tura inlan tur thlan nan erawh hman theih an la beisei lo a ni.

World ranking hi point hmanga chhiar tur a ni dawn a, inelna an hmachhawn len dan leh an chetṭhat dana zirin point an pe ṭhin ang. IAAF president Lord Coe chuan he thil hi ngelnghet taka kalpui tum a nih thu leh, infiammi ṭha ber hriat theih nana siam a nih tur thu a sawi.

IAAF president Lord Coe chuan, "Infiamna huanga a vawi khat nan IAAF world ranking siam a ni dawn a, he thil hian infiamna kawng hrang hranga a thiam leh ṭha bikte chanchin leh nihna awlsam zawka hriat theih nan min pui ngei ang a, inelna liana inlan thei tur thlan nan pawh a ṭangkai hle tura ngaih a ni," tiin a sawi.

September thla hian Doha-ah IAAF World Athletics Championship a awm dawn a, he hunah hian world ranking hmangin infiammi inlan tur thlan a la ni dawn lo, hei vang hian ranking hi tun season chhunga an hmang hman a nih pawhin season tawp lamah a ni ang.