Wilder-a chhuanlam an pawm lo!

American boxer Deontay Wilder chuan Tyson Fury laka a tlawm chhanah a thawmhnaw rihna puh mah se pawm a hlawh lo a, social media lamah chuan American boxer hian nuihzat a hlawh phah hle. 

Pathianni zing khan Fury hian round sarihnaah Wilder hi technical knockout hmangin a hneh a, Wilder-a'n chhuanlam tur a zawng zui. American fighter chuan, "Fury khan eng natna mah min thlen lo. Ka thawmhnaw hak rit lutuk khan minti buai zawk a ni," a ti!

Wilder hian ring chhung luh nan thawmhnaw rit tham tak a inbel a, a thawmhnaw hak rih zawng kha 18.1 kg a tling. "Inhnek tirh aṭang khan tha reng reng ka nei lo a, ka ke a zawi vek a ni," tiin 

a sawi. 

Mahse, Wilder-a thusawi hi Tyson Fury-a thawmhnaw hak tur duangtu Melissa Anglesea chuan a pawm lo hle. Anglesea chuan, "6ft 7in a sang a ni a, a rih zawng ringawt pawh 104 kg a tling. Chutiang ang pian nei tan a thawmhnaw hak kha a rit lo. 

"Heavyweight fighter-te tan thawmhnaw hak tur kan siam ṭhin a, Dillian Whyte-a hak tur kan duan te kha rit tak a ni. Mahse, Dereck Chisora a knockout tho a ni," a ti. 

Hetihlai hian Wilder chuan a vawi thum nana Fury hmachhawn tura contract an neihsa chu bawhzui a tum thu a sawi a, hei hian Tyson Fury promoter Frank Warren a ti lawm lo hle.

Warren chuan, "Kei chuan Anthony Joshua hmachhawn nghal mai ka duh a, mahse contract-in min dang tlat si. Wilder hian sum pek a, a vawi thum nana inhnek loh a duh a nih chuan sum pawh kan pe mai ang," a ti!

Pathianni zinga inhnek entu tam zawkin Wilder hian contract a bawhzui duh an ring lo a, mahse a bawhzui tur thu a sawi miau si - contract hi ziak thar turin ni 30 hun a nei a, a chiang thuai ang.