Pakistan-in England an barakhaih

Pakistan-in ODI match 11 a zawnin hnehna an chang lo a, Cricket World Cup match hmasa berah kum li chhung series la thei tawh lo West Indies lakah run 105 chauh siamin an zawr. Thawhṭanni zanah erawh Pakistan hian run 348 zet an siam a, team ṭha bera ngaih England chu an buzawl Trent Bridge-ah an luhchhuah - Green Army hi hriatthiam an va har tehlul em.

Ṭhumvawrah England an chak a, vawm hmasak an thlang. Bat hmasak vangin Pakistan an buai lo a, wicket riat hlohin run 348 zet an vaw chhuak. England tan Joe Root (107) leh Jos Buttler (103) ten century siam mah se run 334 an siam a, run 14-in Pakistan an chak.

England-in match hmasa berah South Africa an sawp a, bowler chhuak thar Jofra Archer chuan run 27 chauh pein wicket thum a la a, kum 24 mi hi an fak chiam.

Pakistan nen erawh Archer bakah Adil Rashid leh Chris Woakes te chuan run an pe hnem a, an pathum hian over 23-ah run 193 an pe. Woakes erawh wicket thum a lak avangin a ngaihdam theih a, Archer leh Rashid ten wicket an la lo.

Mohammad Hafeez chuan run 84 a siam a, Pakistan tana run siam tam ber a ni. Amaherawhchu, England-in fielding lamah an tihtur an titawk lo a, Hafeez hian run 14 chauh a la siam tihin a ball vuak chu Jason Roy-a'n a thlauh.

Pakistan batsman-te erawhin fak an phu a, England-in wicket an lak hmain opener pahnih Imam ul-Haq (44) leh Fakhar Zaman (36) ten run 82 an siam hman. Pathumnaa rawn lut Babar Azam pawhin run 63 rawn neiin Hafeez (84) leh Sarfaraz Ahmed (55) te an che ṭha a, bat hmasa panga an chet ṭhat vek avangin run 348 an tlin.

Hmabak hautak hi England theihna aṭanga teh chuan thil theih loh a ni lo a, Pakistan tan pawh ngaih ṭha taka awm theih a la ni lo.

England-in bul an ṭan fuh lo. Pakistan spinner Shadab Khan lakah opener Jason Roy talbuaiin run riat chiah a siam tihin lbw hmangin a thi. Hetichung hian Joe Root hmangin inelna thlengtuin beiseina an nei a, paruknaa rawn lut Buttler-a'n a rawn thlawp ṭha bawk.

Over 44.2-ah England hian run 288 an siam a, chak turin ball 34-ah run 61 siam an la mamawh. Amaherawhchu Mohammad Amir chuan Buttler a vawm hlum a, Chris Woakes leh Moeen Ali te rawn che ṭhain ball 14-ah run 29 siam mamawhin chak thei an la ni tho.

Hetah tak hian kum 33 mi Wahab Riaz rawn pen chhuakin Moeen leh Woakes te a rawn vawm hlum ve ve. Green Army tan run 84 siamtu Hafeez chu bowling lamah pawh a che ṭha a, wicket khat chauh la mah se run 43 chauh a pe. Pakistan-in harsatna lutuk tawk loin 14 runs-in hnehna an chang a, batsman nei ṭha England tan pawh run 348 vuak khum chu a harsa hret a ni.