Halep tan kawng a awlsam

French Open hmeichhe singles champion lai Simona Halep tan quarterfinal lut turin harsatna a awm lo. Romanian nula hian minute 44 chhung lekin Iga Swiatek chu 6-1, 6-0 a sawpin a thiam pariat zingah a inhlangkai. Roland Garros, Paris-a inkhelah Halep-i'n a tir aṭanga a tawp thlengin inkhel a thunun hneh hle, tleirawl kum 18 mi chauh Iga tan thawk lakna hun a siamsak lo.

Seeded sang zual paruk zingah Halep chiah hi dam a awm tawh a, a match lehpekah chuan kum 17 mi Amanda Anisimova nen an inhmachhawn leh ang. American tleirawl hian Aliona Bolsova chu 6-3, 6-0 in a lo hneh ve bawk a ni.

World number 51 Anisimova hi kuminah rinkai ni phak lo mah se a khel ṭha chho hle a, match li a khelh tawhah set hloh miah loin a la kaltluang - Grand Slam vawi khat champion tawh Halep tan pawh zuam sual theih tur a ni ang.

Inkhel dangah season hmasa semifinalist Madison Keys chuan Katerina Siniakova 6-2, 6-4 in a hneh a, Sofia Kenin hnehtu seeded pariatna Ashleigh Barty nen an inkhel leh dawn a ni.

Barty hian Serena Williams hnehtu Kenin hi Court Philippe Chatrier-ah 6-3, 3-6, 6-0 in a hneh, set khat ve ve an lak hnuah set thumna bikah game hloh miah loin a tlang - Roland Garros quarterfinal a vawi khat khelhna tur a ni dawn.

Johanna Konta pawhin a dai ngai loh ram a dai chhunzawm zel. Kum 1983 hnu lama Britian nula French Open semifinal khel hmasa ber nih tumin kawng dik a zawh a, seeded 23-na Donna Vekic chu 6-2, 6-4 a hnehin quarterfinal a lut. Nizan khan Sloane Stephens nen an inhmachhawn leh a, he thu buatsaih lai hian result kan hre hman lo.