Cricket World Cup-ah India khelh hun a thleng

Vawiin tlai dar 3:00 hian India chuan kumin Cricket World Cup-a an match hmasa ber an khel dawn a, Ageas Bowl-ah South Africa nen an inhmachhawn ang.

Proteas hian match hnih khel tawhin chak lo ve ve mah se World Cup-ah erawh India hi vawi li an hmachhawn tawhah vawi thum an hneh. Chutihrualin 2015 World Cup-ah Men in Blue hian run 130 zetin an hneh a, Shikhar Dhawan-a'n century a siam.

Kumin World Cup khelh tawh chinah run 300 siam pha an awm chuan hnehna an chang zel a, batsman nei ṭha India pawhin ṭhumvawra an chak chuan an bat hmasak a rinawm zawk. 

A hmasa pathum Rohit Sharma, Shikhar Dhawan leh Virat Kohli te chu khawih chet thiang lo tiin a sawi theih a, palinaa lut turah hian inhnialna a tam. KL Rahul leh all rounder Vijay Shankar te bukin an awm dawn. Warm up match hnuhnung zawkah KL Rahul-a'n century a siam avangin Proteas nen chuan ani baka no. 4-a lut tur chuang an awmin a lang lo. No. 5-ah pawh New Zealand laka run 30 siamtu Hardik Pandya chu Bangladesh laka run hnih siamtu Vijay Shankar ai chuan a la thlanawm zawk tho.

Tawnhriat nei ṭha MS Dhoni erawh paruknaah a awm a rinawm a, batting line up tir an chesual a nih pawhin India captain hlui hi buaina chingfeltu tur a ni ang.

South Africa batsman hmaah Jasprit Bumrah fiahin a awm dawn a, ani hi ODI bowlers ranking-ah pakhatna dinhmun hauh mektu a ni.

Proteas hian an match hmasa berah England an hneh loh ṭumin run 207 chauh siam mah se over 39.5 thleng chauh an vua tih hriat a ṭha a, Bangladesh laka an chak loh ṭum pawhin run 309 an siam pha. India hi ranking-ah sang zawk leh rinkai zawk ni mah se Pakistan-in England an hneh theih chuan Men in Blue pawh South Africa lakah ngaih ṭha taka awm a thiang lo.

South Africa: Faf du Plessis (capt), Quinton de Kock, Imran Tahir, David Miller, JP Duminy, Lungi Ngidi, Kagiso Rabada, Aiden Markram, Chris Morris, Andile Phehlukwayo, Tabraiz Shamsi, Dale Steyn, Dwaine Pretprius, Rassie van der Dussen, Hashim Amla.

India: Rohit Sharma, Shikhar Dhawan, Virat Kohli(c), Vijay Shankar, MS Dhoni(w), Kedar Jadhav, Hardik Pandya, Ravindra Jadeja, Mohammed Shami, Jasprit Bumrah, Bhuvneshwar Kumar, Lokesh Rahul, Dinesh Karthik, Kuldeep Yadav, Yuzvendra Chahal