CAS hnenah Man City an zualko

Manchester City-in season hnih chhung Europe inelnaa tel lo tura UEFA-in an hremna chu pumpelh tumin infiamnaa thubuai ngaihtuahtu sang ber Court of Arbitration for Sport (CAS) hnenah an zualko.

Premier League club hi UEFA financial regulationA an bawhchhiat avangin euro maktaduai 30 (£25m) chawi tura tih an ni bawk. Man City chief executive Ferran Soriano chuan an hremna chhan chu thudik lo a nih thu a sawi tawh.

CAS chuan Man City buaina an chinfel hun tur a la hriat theih loh thu an sawi. Man City hremna hian nghawng a neih len avangin ngaihven a hlawh a, hremna hi a kaltlang a nih chuan Premier League-a panganain season tharah Champions League khel thei tura ngaih a ni.