Liverpool-in Club World Cup khel dawn

FIFA Club World Cup chu khelh loh tur niin khawthlang media ten tarlang zet mah se kuminah khelh a ni dawn a, Champions League nomawi chawitu Liverpool an inlan dawn. 

Football-a thuneitu sang ber FIFA chuan tun hnai khan Club World Cup khelh dan phung hi a thlak danglam a, 2021 aṭangin FIFA Confederations Cup aia kum li dan zela khelh tura tih a ni. 

Mahse, team 24 inelna tura tih tawh Club World Cup hi a dan thar hman a nih hma 2019 leh 2020-ah khelh ve ve tur a ni dawn a, World Cup 2022 thleng tur Qatar chuan a thleng ve ve ang. 

Liverpool hian season tharah chuan inelna pasarih an hmachhawn dawn tihna a ni a, Club World Cup hi December-ah an khel dawn a ni.

Khawvela football club ṭha ber zawnna inelna bakah hian Reds hi Premier League, Champions League, FA Cup, League Cup, UEFA Super Cup leh Community Shield-ah an inlan dawn. 

Liverpool-in Club World Cup an khelh hnuhnun ber chu 2005-a Champions League nomawi an chawi ṭum kha a ni a, final-ah South American champion Sao Paulo chu 1-0 in an ngam lo. 

Real Madrid chu tun dinhmuna Club World Cup champion lai an ni a, December khan United Arab Emirates club Al Ain chu 4-1 in final-ah an hneh a ni.